निरोप तुजला देताना

लेक चालली सासरी

किती करु तिचे लाड

माझ्या काळजाचा तुकडा

आज होईल नजरेआड

लेक चालली दूरदेशी

किती न्याहाळून पाहू

हाती कुंकवाचा करंडा

वाटी मैनाला गं लावू

किती वाट गं मी पाहू

आता कधी येशील परत?

तुझ्या भेटीची गं आस

मनात राहील तेवत

माझी लेक गं बाई जशी

जशी पाडस हरिणी

भरकन उडून गेली

जणू घरट्यातून चिमणी

आज झालीस परकी

तुझं केलं कन्यादान

निरोप तुजला देताना

आला कंठाशी गं प्राण

अशी कशी रे ही रीत

नाव तिचं रे पाठवणी

माय-लेकीच्या विरहाची

ही करुण कहाणी