जुळे

भुई सवे आभाळाची, जुळे आज प्रीती 

उठावले घन घन घोर, नील कंठ झाले मोर 

पिसार्यात लाखो डोळे, गगन न्याहाळीती 

निळामधे हीरक जडती, तसे शुभ्र बगळे उडती 

कोसळती धारा धारा, दिशा धुंद होती 

चिंब चिंब जांभुळ रानी, मेघ मंद्र घुमती गाणी 

मुके भाव हृदया मधले, शब्द रूप होती 

तृप्त शांत झाली धरणी, मधुस्म्रिते हिरव्या कुरणी 

पुसट चुंबना सम ओल्या सरी येती जाती 

गगन धरा झाली एक, मुक्त प्रीतिचा अभिषेक 

एक निळ्या आनंदाची धुंद ये प्रतीती