अशी सांज येते

मावळतीच्या वाटेवरी अशी सांज येते

आठवांची आसवे ढळतात कुठूनी

सोबतीला माझ्या एकांत असताना

तुझी आर्त हाक येते दुरूनी

आतुरलेली वाट वळणाची

तुझी पावले शोधत राहते

सावळ्याश्या सांजेत, मग

सावली माझी मला दुरावते

अंगणी कधी अशी सांज येते

सोनपिवळ्या किरणांनी मोहरलेली

पारिजातकापरी रिता होता

आठवांनी ओंजळ माझी भरलेली

सख्या जेव्हा अशी सांज येते

अबोल थोडी, थोडी कुंद

सारे जग स्तब्ध होते 

तू सांजवता मंद मंद