ಪ್ರೀತಿ ನೆಟ್ಟವಳು

ಸಾಗರದ ಶಕ್ತಿಗೆ ಅದ್ಬುತ ಯುಕ್ತಿಗೆ

ಭೋರ್ಗರೆದು ಬೆಳೆದ ಜನ್ಮದಾತೆಗೆ

ತೊತ್ತೆಂದು ಜರಿದರೂ ಮುತ್ತೆಂದು ಕರೆದರೂ

ಆದವಳು ಸಬಲೆ ನೀನಲ್ಲವೆ

ಸಬಲೆಯೋ ನೀ ಅಬಲೆಯೋ...|

ಚಂದನವ ಕೊರೆದು ತೇದೊಡೆ

ನೊಂದೆನೆಂದು ಕಂಪ ಬಿಟ್ಟಿತೇ

ಸಾಧನೆಯ ಶಿಖರಕ್ಕೆ ಮುಕುಟ

ಹೆಣ್ಣಲ್ಲವೆ ಸಾಧನೆಯ ಕಣ್ಣಲ್ಲವೆ

ಎತ್ತರದ ಮನೆಯವಳು ನೀನಲ್ಲವೆ...|

ತವರು ಬಿಟ್ಟವಳು ಪ್ರೀತಿಯ ನೆಟ್ಟವಳು

ಹಗಲಿರುಳು ಕೈ ಹಿಡಿದು ನಡೆದಾಳು

ಹೆಗಲಿಗೆ ಹೆಗಲಾಗಿ, ಹಿರಿಯರಿಗೆ ತಲೆಬಾಗಿ

ಬಾಳುವ ನಿನ್ನ ಪಯಣದ ಮಾಯೆ ನಾನರಿಯೆ

ನಗುತಿರು ನೀನು ಮೌನದ ನಡುವೆ...|

ಗೆಜ್ಜೆಯ ಕಾಲಲಿ ಹೆಜ್ಜೆಯ ಗುರುತಿಟ್ಟು

ಬದುಕನು ಮೆಟ್ಟಿ ಮನೆಯನು ಅರಿತಾಕೆ

ಬರೆವುದೇನು ಸೋಜಿಗ ತಿಳಿಯಲಾರದೀ ಜಗ

ಸಾವಿರದ ಮನೆಗಳಲಿ ಮನೆಯ ಮಾಡಿದೆ

ಮನುಕುಲವೇ ತಾಯೆಂದು ನಿನ್ನ ಪೂಜಿಸಿದೆ...|