જરૂરી

ક્યાં પગલાં ખોટાં પડ્યાં એ વિચારવું જરૂરી,

માનવ થૈ કેટલાંને નડ્યાં એ વિચારવું જરૂરી,

આમ તો સિદ્ધાંતને માનનારા રહ્યા આપણે,

તોયે બીબાં ઢાળે ઢળ્યાં એ વિચારવું જરૂરી,

નિજત્વ ગુમાવી રહ્યાં ટોળાંશાહીના યુગમાં,

વહેતા વાયરે શીદને ભળ્યાં એ વિચારવું જરૂરી,

સ્વાર્થની લોલુપતામાં સાવ અંધ બની ગયાં,

સ્વજનો સાથે જ બાખડ્યાં એ વિચારવું જરૂરી,

બીજાની આંખે જોવાની દ્રષ્ટિ ગુમાવી બેઠાં,

કરીને ક્રોધ કેવાં ઊકળ્યાં એ વિચારવું જરૂરી,

હજુએ પાછાં ફરીએ મોડું નથી થયું માનીને,

અહં અકબંધ ના ઓગળ્યા એ વિચારવું જરૂરી.