અપેક્ષાઓ આપણી

રોજરોજ વધતી જાય છે અપેક્ષાઓ આપણી,

ક્યાં કદીએ પૂરી થાય છે અપેક્ષાઓ આપણી,

મનગતિ અવિરત નિતનવું ઝંખનારી હોય છે,

ન થતાં દુઃખ ઉત્પન્ન થાય છે અપેક્ષાઓ આપણી,

બ્રહ્મના બાપની પણ ઈચ્છા અહીં અધૂરી રહે છે,

અતીતમાં આખરે ધરબાય છે અપેક્ષાઓ આપણી,

સંતોષ માત્ર શબ્દકોશમાં જ જોવા મળતો શબ્દ,

વ્યવહારે વિકરાળ દેખાય છે અપેક્ષાઓ આપણી,

વિષચક્ર અપેક્ષાનું માનવીને અસંતોષ જન્માવતો,

તોય માનવી આશા કર્યે જાય છે અપેક્ષાઓ આપણી.