અંતરનો અરીસો

અંતરનો અરીસો બની જાય છે કવિતા,

કોઈ સહૃદયીને વળી સમજાય છે કવિતા,

ઉર્મિનું અક્ષરમાં છે રુપાંતર એ આખરે,

આખ્ખેઆખાં ઉરને ચીતરી જાય છે કવિતા,

હળવાશ જરુર અનુભવી હશે સર્જકે,

પ્રસૂતિની જેમ રખૈને પ્રગટાય છે કવિતા,

બનીને મૌન અક્ષરદેહે આગળ ધપતી,

કદરદાન ભાળીને એ મલકાય છે કવિતા,

શબ્દથી અર્થને અર્થથી અંતર સુધીમાં, 

થઈ પ્રવાહી નદી જેમ વહી જાય છે કવિતા,

નિજાનંદે ભરપૂર ભાવને હોય પ્રસારતી,

અંતરથી નીકળી અંતરમાં સમાય છે કવિતા.