ओवीबद्ध चरित्र :संत दासगणू

कथा मी सांगतो आज | दासगणू महाराज |

सोडोनिया सर्व काज | ऐकावे श्रोतेजन ||१ ||

गणेश हे शुभनाम | सहस्त्रबुद्धे कुलनाम |

अकोळनेर हे ग्राम | जन्म दासगणूंचा ||२ ||

रानड्यांची सरस्वती | पाणिग्रहण करिती |

चाकरी पोलिसखाती | उदरनिर्वाह होई ||३ ||

कान्हा गुंडासी पकडा |आज्ञा देई साहेब बडा |

भरला पापाचा घडा | कुख्यात गुंडाचा ||४||

समोरासमोर येती | गुंड अन् दासगणूयती |

रामकृपे वाचती | श्री संत दासगणू ||५||

तेव्हा आले वैराग्य | उजळे दासांचे भाग्य |

गुरू भेटला तो योग्य |गुरू वामनशास्त्री ||६||

साईबाबांचे दर्शन | धन्य होतसे जीवन |

मिळे त्यांसी वरदान | भक्तीपर लेखन ||७||

नाममुद्रा 'गणू म्हणे' | अभंग ईश्वराचे देणे |

करूया हो पारायणे | गजानन विजय ||८||

दिव्य स्तोत्रांचे जनक | संतचरित्र लेखक |

साईबाबांचे बालक | 'महीपती' दासगणू ||९||

शिर्डी माझे पंढरपूर | सांई रहेम नजर |

अभंग रचना भक्तीपर | ओथंबलेला असे ||१०||

समाधी गोरटे गावी | निजानंदी वृत्ती असावी |

दासगणू संतकवी | आजि जयंती असे ||११||

संक्षिप्त चरित्र वर्णन | 'वैभव' करितो नमन |

दासगणूंचे पूजन | करितो आम्ही भक्त ||१२||