મેહુલો

ઓલા, મેહુલાને કે'જો કે,

જાન જોડીને આવે,

ઉમડતો ને ઘુમડતો,

વાદળોના રથે સવાર 

થ‌ઇને આવે.

કડાકા ને ભડાકા એ જાણે

એની જાનમાં ફુટતાં ફટાકડાં,

વળી, તેજના લસરકા,

સંગાથે લ‌ઇને આવે.

સોનેરી ને રૂપેરી કોરે,

દામિની દમકતી આભલે,

એના ચમકારા ફાનસ 

બનીને આવે.

મનોહર રંગો રેલાયા આકાશે,

મેઘધનુષ રંગોથી ભરપૂર ,

રંગોળી લ‌ઇને આવે.

કોડીલો, કામણગારો મેહુલો,

ફોરાં, ટીપાં ને કરાં જેવા

જાનૈયાઓને જોડીને આવે.

મેહુલાનું સ્વાગત કરવાને,

દેડકાઓ સૌ પહેલા પધારે,

'ડ્રાઉં - ડ્રાઉં' કરી માહોલ

બનાવી આવે.

મેહુલાની સવારી આવતી જોઇ,

મયૂર સૌથી વધુ હરખાયે,

જાનમાં એ નાચતો

ને કળાઓ કરીને આવે.

મેહુલાની આગતા-સ્વાગતા કરવાને,

કાગને ડોળે રાહ જોતો

ઓલો ચાતક,જાનમાં

અણવર બનીને આવે.

ધરતીને પણ પિયુ મિલન કાજે,

નવોઢા શી લજાતી જોઇ,

મેહુલો વરરાજ મલકાતો આવે.