Exclusive FREE session on RIG VEDA for you, Register now!
Exclusive FREE session on RIG VEDA for you, Register now!

Ranjit pal

Others


4.5  

Ranjit pal

Others


ହଜିଗଲା ମାମୁଁଘର

ହଜିଗଲା ମାମୁଁଘର

4 mins 458 4 mins 458


    ପିଲାବେଳେ ମାମୁଁଘରକୁ ଯିବା ଶୁଣିଦେଲେ ମନଟା ଖୁସିରେ ଉଛୁଳିପଡେ | ମନରେ ଆଙ୍କି ହୋଇଯାଏ ଦୁଇ ଦାଣ୍ଡି ନାଲି ଟାଇଲ୍ ଘର ମଝିରେ ବିରାଟ ଅଗଣା ଓ ଛାତିଏ ଉଚ୍ଚା ଚଉରା | ଗୋଟେ ଦାଣ୍ଡିରେ ଠାକୁର ଘର, ଶୋଇବା ଘର ଦି ବଖରା , ଚାଉଳ ଆଲମାରୀ ଘର, ହାଣ୍ଡିଶାଳ | ଆର ଦାଣ୍ଡିରେ ଧାନଘର ଦି ବଖରା, ଢିଙ୍କିଶାଳ | ତାପରେ ପୁଣି ରୋଷେଇଘର ଖଞ୍ଜା ପରେ ଆଉ ଗୋଟେ ଅଗଣା , ବାଡି ଅଗଣା | ମଝିରେ ପଣସ ଗଛ , ଡାଳିମ୍ବ ଗଛ, ମନ୍ଦାର ଗଛ | ଦାଣ୍ଡପଟେ ବିରାଟ ଗୁହାଳ | ଘର ସାମନାରେ ଦାଣ୍ଡରେ ବିରାଟ ଚଉତରା | ଏକ ସ୍ୱପ୍ନପୁରୀର ଭ୍ରମ ସୃଷ୍ଟିକରେ | 

    ମାମୁଁଘର ଶଗଡ ଲାଗେ ଆମ ବାଡିପଟେ | ବୋଉ ସଜହୁଏ ବାପଘରକୁ ଯିବାକୁ | ଆମେ ବି ସଜହେଉ | ଗୋଡ ତଳେ ଲାଗେନା | ଶଗଡରେ ତାଟ ପଡିଥାଏ | ତା ଉପରେ ପାଲ ବନ୍ଧା ହୋଇଥାଏ | ଭିତରେ ନଡା ପଡି ତା ଉପରେ ସପ ଓ ତା ଉପରେ ସତରଞ୍ଜି ପଡିଥାଏ | ଧଳା ଧଳା ଚିତେ ଉଚ୍ଚା ବଳଦ, ଟିପ ମାଇଲେ ରକ୍ତ ବାହାରିଯିବ , ମୁଣ୍ଡରେ

କଉଡି ମାଳରେ ଚଉଁରୀ ବନ୍ଧା ଓ ବେକରେ ପିତଳର ଘଣ୍ଟି ଘାଗୁଡି ମାଳ, ଚାଲିଲା ବେଳେ ମଧୁର ଶବ୍ଦ ସୃଷ୍ଟି କରେ |

    ମାମୁଁଘର ଦୁଆରେ ଶଗଡ ଲାଗୁ ଲାଗୁ ସାଇ ପଡିଶା ଧାଇଁ ଆସନ୍ତି | କିଏ କେତେ ପ୍ରକାରେ ପଚାରେ | ମଢିମା ତା ବେହାଡା ଦାନ୍ତ ଦୁଇ ଧାଡି ଦେଖେଇ ହେଁ ହେଁ ହୋଇ ହସେ | ମୁଁ ଜାଣିପାରେନି ସେ କାନ୍ଦୁଛି ନା ହସୁଛି | ବେହେରା ଘର ବୁଢୀ ଧାଇଁଆସି ଆମକୁ କୁଣ୍ଢାଇ ପକାଏ | କାଖେଇ କୁଣ୍ଢେଇ ଘର ଭିତରକୁ ନେଇଯାଏ |

    ଆଈର ସେ ଗୋରା ତକ ତକ ମୁହଁରେ ଯେମିତି ହଜାରେ କୃଷ୍ଣଚୂଡା ଫୁଟିଉଠନ୍ତି | ଅଜା ଚଉତରା ଉପରୁ ଉଠିଆସି ଅଗଣାର ଗୋଟିଏ କଡକୁ ପିଣ୍ଡା ଉପରେ ପଡିଥିବା ଖଟରେ ବସି ବୋଉକୁ ଆମ ଘରକଥା ପଚାରନ୍ତି ଓ ତା ସଙ୍ଗେ ସଙ୍ଗେ ଆମକୁ କେତେ ଥଟ୍ଟା ମଜା କରନ୍ତି | 

    ସନ୍ଧ୍ୟା ହେଲେ ଘରେ ରହି କାମ କରୁଥିବା ଲୋକଟି ଡିବି, ଲଣ୍ଠନ ସବୁ ପୋଛି କିରାସିନି ପକେଇ ଜଳାଇଦିଏ | ଘରେ ସତେ ଯେମିତି ଲକ୍ଷ୍ମୀ ବିରାଜିଛନ୍ତି | ଆଃ କି ସ୍ନେହ ସରାଗରେ ଭର୍ତ୍ତି ଘର | ପୁରା ଖରା ଛୁଟୀଟା ହିଁ ସେଠି କଟେ |

    ରାତିରେ ଅଗଣାରେ ଖାଇବସିଲା ବେଳେ ଉଷୁନାଭାତରେ ଗୁଆଘିଅ ସର ସର ହୋଇ ପଡେ | ମୁଗଡାଲି ସାଥୀରେ ଚେକା ଚେକା ଆଳୁ ବାଇଗଣ ଭଜା | ତୋଟାରୁ ଆସିଥିବା ସବୁଠୁ ମିଠା ଆମ୍ବ କଟାହୁଏ | ବାଃ ...ଖାନାଟା ଜମିଯାଏ | ଏବେବି ସେ ବାସ୍ନା ମୋର ମନେପଡିଯାଏ ବେଳେବେଳେ 

    ମାମୁଁଙ୍କ ଦେହ ଖରାପ ଶୁଣିଲି | ବହୁତ ଦିନ ହେଲା ଯାଇନଥିଲି, ବୋଧେ କୋଡିଏ ବର୍ଷ ହେବ | ମନ ସମ୍ଭାଳିଲାନି, ଗାଡିଟା ବାହାରକରି ଗୁଡାଏ ମିଠା ଆଉ ଫଳ ମୂଳ ଧରି ଚାଲିଲି | ମାମୁଁଘର ଗାଁଟା ଆମ ଗାଁ ଠୁ ଦଶ କିଲୋମିଟର ହେବ ପଶ୍ଚିମକୁ | ଅପରାହ୍ନର ଗରମ ସୂର୍ଯ୍ୟ ମୁହଁକୁ ମାରୁଥାଏ | ମାମୁଁଘର ଗାଁ ଛକରେ ପହଞ୍ଚି ଟିକେ ନଜର ଦୌଡାଇଲି ଚାରିପଟକୁ | ବସ୍ ଷ୍ଟାଣ୍ଡ ରେ ଥିବା ସେ ତ୍ରୀନାଥ ଚାନ୍ଦେନି ଓ ଘଞ୍ଚ ବରଗଛକୁ ଦେଖିଲିନି | ରାସ୍ତା ଚଉଡା ହୋଇ ତା ଗର୍ଭରେ ତାକୁ ଲୀନ କରିଦେଇଛି | ତା ପାଖରେ ଥିବା ଭୁଜ ଗୁଡିଆର ସେ ବରା ଦୋକାନ ବି ନାହିଁ | ବଡ ବଡ ବିରି ବରା ଭିତରେ ଗୁଡ ନଡିଆ ଗୋଲମରିଚର ପୁର ଦିଆହୋଇ ବାଦାମ ତେଲରେ ଛଣା ହୋଇଥିବା ବରା ଅନେକ ଥର ମାମୁଁ ଆଣନ୍ତି | ମୁଁ ଖାଇଛି ବହୁତ ଥର | 

    ଛକଟା ଗୋଟେ ଛୋଟିଆ ବଜାର ହୋଇଯାଇଛି | ଗୋଟେ ଦୋକାନରେ ପଚାରିଲି ଭୁଜ ଗୁଡିଆ କଥା | ସେ କହିଲା," ବାବୁ ! ତୁମେ କେମିତି ଜାଣିଲ ତାକୁ ?" ମୁଁ ମୋ ପରିଚୟ ଦେଲି | ସେ କହିଲା ଯେ ତା ର ଦେହ ଖରାପ | ତା ପୁଅ ସେଇ ଆଗରେ ମିଠା ଦୋକାନ ଦେଇଛି | ଆମ ଏଠାର ବରା ତ ବହୁତ ପ୍ରସିଦ୍ଧ | ତେଣୁ ଗୁଡିଏ ଦୋକାନ ଖୋଲିଲାଣି

    ମାମୁଁଘର ସାଇ ଭିତରତୁ ଗାଡି ବୁଲେଇଲି | ସାଇରେ ଚାଳ କି ଟାଇଲ୍ ଘର ଗୋଟେ ବି ନାହିଁ | ସବୁଆଡେ ପକ୍କାଘର | ସାଇ ମଝିରେ ଥିବା ଟଗର ଗଛ, ଚମ୍ପା ଗଛ ଗୋଟେ ବି ନାହିଁ | ସବୁ ସଫାହୋଇ ଦାଣ୍ଡ ସିମେଣ୍ଟ ହୋଇଯାଇଛି | ମାମୁଁଘର ଦୁଆରେ ପହଞ୍ଚିଲି | କେହି ନାହାନ୍ତି | ଚଉତରା ଉପରେ ଗହଳି ନାହିଁ | ଦାଣ୍ଡ ବି ଶୁନ୍ ଶାନି | ଯେଉଁ କେତୋଟି ମୁହଁ ଦିଶୁଥିଲା ସବୁ ଅଚିହ୍ନା ଥିଲା | ଦାଣ୍ଡ ଦୁଆର ଚଢି ଘର ଭିତରକୁ ପଶିଲି | ନା ଗୋବରର ଗନ୍ଧ ନାକରେ ବାଜିଲା ନା ଗୁହାଳେ ଗୋରୁ ଥିଲେ | ବିରାଟ ବଡ ଗୁହାଳ ଖାଲିପଡିଛି | ମୋ ଦେଖିବାରେ ତିନି ହଳ ବଳଦ ଓ ଚାରି ପାଞ୍ଚଟା ଗାଈଥିଲେ |

    ଗୁହାଳ ଟପି ଅଗଣାରେ ଗୋଡ ଦେଲି | ବାଁ ପଟକୁ ଚାହିଁଲି | ଏଠି ଠାକୁର ଘର ଦୁଆରେ ଆଈର ଗୋରା ଦକଦକ ମୁହଁଟା ନଜରରେ ପଡିଲାନି | ଡାହାଣ ପଟକୁ ଚାହିଁଲି | ପିଣ୍ଡା ଉପରେ ଅଜା ବସୁଥିବା ଖଟଟା ତ ପଡିଛି ମାତ୍ର ଅଜା ନାହାନ୍ତି |

    ମୁଁ ଜାଣିଛି | ଅଜା ଆଈ ଆଉ କେବେବି ଫେରିବେନି ତାଙ୍କ ନାତିକୁ ହସି ହସି ଘର ଭିତରକୁ ପାଛୋଟି ନେବାକୁ | ମାମୁଁଙ୍କ ବୋହୁ ଅଗଣାକୁ ବାହାରି ଆସି ମୋତେ ଅଚିହ୍ନା ପାଇ ପୁଣି ଘର ଭିତରକୁ ପଶିଗଲେ | ଦଶ ବର୍ଷର ପୁଅଟି ଆସି ପଚାରିଲା... ଆପଣ କାହାକୁ ଖୋଜୁଛନ୍ତି ? ମୁଁ କିଛି ଉତ୍ତର ଦେବା ପୂର୍ବରୁ ପାଟି ଶୁଣି ମାମୁଁ ବାହାରି ଆସିଲେ ଅଗଣାକୁ | ମୋତେ ଅନେକ ଦିନ ପରେ ଦେଖି ଖୁସିରେ ତାଙ୍କ ମୁହଁ ଝଲସି ଉଠିଲା |ମୁଁ ନମସ୍କାର କଲି ମୁଣ୍ଡନୁଆଁଇ | ସେ ପାଟିକରି କହିଲେ, " ବାଘମାରୀ ନାନୀ ପୁଅ ଆସିଛି ତା ପାଇଁ ଜଳଖିଆ ସଜ କର | ମୁଁ ଜାଣିଲି ବୋହୁଟି ଉଦ୍ଦେଶ୍ୟରେ ତାଙ୍କର ଏ କଥା | ମାଇଁ ପାଗଳୀ | ବାଡିପଟ ଖଞ୍ଜାରେ ଥିବେ | ଅଜାଙ୍କର ଛଅ ଝୀଅରେ ଗୋଟିଏ ପୁଅ | ମୁଁ ବଡ ଆଡୁ ଦୁଇ ନମ୍ବର ଝୀଅର ପୁଅ | 

    ମାମୁଁଙ୍କୁ ଦେହ କଥା ପଚାରିଲି | ମୁଁ ନେଇଥିବା ହର୍ଲିକ୍ସ୍ ଫଳ ମୂଳ ସବୁକୁ ଆଗ୍ରହର ସହ ଦେଖିଲେ ମାତ୍ର କିଛି ଖାଇଲେନି | ବୋହୁଟି ଆସି ମୁଣ୍ଡିଆ ମାଇଲା | ଥଣ୍ଡା ଗ୍ଲାସ୍ ଟି ଟେବୁଲ ଉପରେ ଥୋଇ ଓଢଣା ଟାଣି ଚାଲିଗଲା | ମାମୁଁଙ୍କ ପୁଅ ଘରେ ନଥିଲା | ମୁଁ ଥଣ୍ଡା ପିଇସାରି ଉଠି ଠିଆହେଲି | ପୁଣି ଥରେ ଆସିବାର କଥାଦେଇ ଫେରିଲି ଗାଁ କୁ | ଅତୀତର କଥାଗୁଡା ମନେପଡି ମନଟା ଗୋଳେଇ ଘାଣ୍ଟି ହେଲା | 

    ମୋତେ ଲାଗୁଥିଲା ସତେ ଯେମିତି ମୁଁ ଆଉ କେଉଁଠିକି ଭୁଲରେ ଚାଲିଆସିଛି | ଇଏ କଣ ସେଇ ମୋ ମାମୁଁଘର ଗାଁ ??? ବିସ୍ମୃତିର ଗର୍ଭରୁ ଘଟଣା ଗୁଡିକ ଟାଣି ଓଟାରି ବାହାର କରିବାକୁ ଚେଷ୍ଟାକରି କେବଳ ଦୀର୍ଘଶ୍ୱାସ ହିଁ ଛାଡୁଥିଲି | ମାମୁଁଘର ଗାଁଟା ମୋ ଆଗରୁ ଯେମିତି ହଜିଯାଇଥିବାର ପ୍ରତ୍ୟୟ ହେଉଥିଲା |     

 


Rate this content
Log in