ଦରଶନ କରି ଚାଲଯିବା ମନ
ଦରଶନ କରି ଚାଲଯିବା ମନ
ରଥେ ବସିଛନ୍ତି ମୋ କଳା ବାମନ
ଦରଶନ କରି ଚାଲ ଯିବା ମନ ।
ଆଷାଢ ମାସର ଦ୍ୱିତୀୟାର ଦିନ
ଦରଶନେ ପାପ ତାପ ବିମୋଚନ ॥
ବାଇଶି ପାହାଚେ ହୋଇବେ ପହୁଣ୍ଡ
ଟାହିଆକୁ ବାନ୍ଧି ହଲାଇବେ ମୁଣ୍ଡ ।
ବଡଦାଣ୍ଡେ ଭକ୍ତ ହୋଇଲେଣି ରୁଣ୍ଡ
ଜୟ ଜଗନ୍ନାଥ କହୁଥାଉ ତୁଣ୍ଡ ॥
ସିଂହଦ୍ୱାରେ ତିନି ରଥ ହେଲେ ସଜ
ଚାରେ ଚଢିଯିବେ ରଥେ ପ୍ରଭୁ ଆଜ ।
ପତିତପାବନ ଉଡେ ଯାର ଧ୍ୱଜ
ପତିତ ଉଦ୍ଧାର ଯାତ୍ରା ମନ ଭଜ ॥
ଆଗେ ବଡ ଭ୍ରାତା ମଝିରେ ଭଉଣୀ
ପଛରେ ଆସୁଛି ବିଶ୍ଵ ଚିନ୍ତାମଣି ।
ଶୁଭେ ହରି ବୋଲ ହୁଳହୁଳି ଧ୍ୱନି
ନାମ ସଂକୀର୍ତ୍ତନ ଠାବେ ଠାବେ ପୁଣି ॥
ବଳଗଣ୍ଡିଠାରେ ଅଟକିବ ରଥ
ସାଲବେଗ ଭାବେ ବନ୍ଧା ମୋର ନାଥ ।
ଯେ ଭାବେ ଡାକିଛି ତେଜି ନିଜସ୍ୱାର୍ଥ
ତା'ପାଇଁ ଅଟକିଛନ୍ତି ଜଗନ୍ନାଥ ॥
ଶରଧା ବାଲିରେ ଯିବେ ଶରଧାରେ
ପହଞ୍ଚିବେ ଯାଇ ମହା ବେଦୀଠାରେ ।
ଗୁଣ୍ଡିଚା ବାଡିରେ ମନ ତା ପିଠାରେ
ଆଡପ ମଣ୍ଡପେ ବସିବେ କୋଠାରେ ॥
ଏହିପରି ନାନା ଦୃଶ୍ୟ ଦେଖିଦେଖି
ଧନ୍ୟ ହେବ ମନ ନିଜ ଚର୍ମ ଆଖି ।
ଦୟା ରଖିଥିବେ ପ୍ରଭୁ ଚକାଆଖି
ସଂସାର ଜଂଜାଳେ ହେବୁନାହିଁ ଦୁଃଖି ॥
ଶରତ ଚନ୍ଦ୍ର ଜାଲି
ତା:୧୮/୭/୧୮