ଦଣ୍ଡଯାତ୍ରା

ଆଞ୍ଚଳିକ ଗତ ଲୋକକଳା ନୃତ୍ୟ 

ଦଣ୍ଡୁଆ ଖେଳଇ ଦଣ୍ଡ 

ଦଣ୍ଡ ନାୟକର ଦଣ୍ଡ ଅନୁଯାୟୀ 

ଦଣ୍ଡ ଭୋଗେ ଭକ୍ତ ପିଣ୍ଡ |

ଦଣ୍ଡୁଆ ଦଣ୍ଡକ କରି ଆକର୍ଷିତ 

ଭକ୍ତିରେ ଭାଙ୍ଗନ୍ତି ଦଣ୍ଡ 

ବିଶ୍ୱାସେ ଭକତ କରେ ଦଣ୍ଡବତ 

ଦୁଃଖ ହେବେପାଇଁ ପଣ୍ଡ |

ମଧ୍ୟାହ୍ନ ସମୟେ ଦାଣ୍ଡରେ ଦଣ୍ଡକ 

ନଚାଏ ଭିଆଇ କାଣ୍ଡ 

ଶେଷରେ ସଭିଙ୍କୁ ଉଦ୍ଧାର କରଇ 

ପିଠିରେ ପକାଇ ଦଣ୍ଡ |

ଜ୍ଞାନୀ ଗୁଣୀ ଜନ ଅଧମ ଅକ୍ଷମ 

ଅବା ଅକାଳକୁଷ୍ମାଣ୍ତ 

ସମସ୍ତ ମାନବ ନୁଆଇଣ ମୁଣ୍ଡ 

ଖାଉଥାନ୍ତି ବେତଦଣ୍ଡ |

ନ ହୋଇ ଦୁର୍ଦ୍ଦଣ୍ଡ କରେ ମାନସିକ 

ଯାତ୍ରା ମଧ୍ୟରେ ପ୍ରକାଣ୍ଡ 

ଘେନିଣ ଶିଖଣ୍ଡ ବାନା ଆଉ ଦଣ୍ଡ 

ବଜାଇ ବାଜା ପ୍ରଚଣ୍ଡ |

ସାରି ଧୂଳିଦଣ୍ଡ ଜଳ ଦଣ୍ଡ ପାଇଁ 

ପୋଖରୀରେ ହୋଇ ରୁଣ୍ଡ 

ଝୁଣା ଧୂପ ଦେଇ ଅଗ୍ନିଦଣ୍ଡ ପରେ 

ଭକ୍ଷଣ କରନ୍ତି ଚଣ୍ଡ |

କାଳୀ ମାତା ସାଥେ ନଗର ଭ୍ରମଣ 

ଚାଲନ୍ତି ଖାଲି ପହଣ୍ଡ

ବେତ୍ରଦଣ୍ଡ ପରେ ଝାଡ଼ି ଶିଖଣ୍ଡରେ 

ପାପ ନାଶେ ପଣା ଭାଣ୍ଡ |

ରାତ୍ରିକାଳେ ପୁଣି ପରଭାରେ ଆସି 

ଠାକୁର ଖେଳନ୍ତି ଦଣ୍ଡ 

ରାତ୍ରୀଦଣ୍ଡ ସାରି ଉଜାଗର ରହି 

ଭରନ୍ତି ପେଟ ଚାଖଣ୍ଡ |

ଏ ମାଟି ଭକତ ହୁଏ ଆତଯାତ 

ପୁରପଲ୍ଲୀ ରାଜଦାଣ୍ଡ 

ଗଞ୍ଜାମର ଜାତ ବିଶ୍ୱରେ ବିଖ୍ୟାତ 

ଦେଖୁଛି ଆଜି ବ୍ରହ୍ମାଣ୍ଡ |