ଅକ୍ଷୟ ତୃତୀୟା

ଅକ୍ଷୟ ତୃତୀୟା ପାଇଁ ପ୍ରତୀକ୍ଷିତ

ହୋଇ ଚଷା ପୁଅ ବସେ

ଶରଧାରେ ମୁଠେ ହାତରେ ବିହନ

କ୍ଷେତରେ ବୁଣି କି ଆସେ। ।1

ଅକ୍ଷି ମୁଠି ଧରି ଚଷା ଭାଇ ଯେବେ

ବୁଣେ କ୍ଷେତେ ଯେ ବିହନ

ଶସ୍ୟ ଉଗାଳିବ ଭାବୁ ଥାଇ ମନେ

ହୋଇ ସହାସ୍ୟ ବଦନ।।2

ଚଷା ଭାଇ ସିନା ସହେ ଖରା ବର୍ଷା

ମୁଣ୍ଡ ଝାଳ ତୁଣ୍ଡେ ମାରି

କିଏ ସେ କରିବ ଲାଘବ ତାହାର

ଦୁଃଖ ଭାଗ ଯାଏ ଭରି ।।3

ଚାଷୀ କୂଳ ଆଜି ଉଜୁଡ଼ି ଯାଉଛି

କେହି ବୁଝୁ ନାହିଁ ଦୁଃଖ

କଥାରେ ପକାନ୍ତି ସର ଯେ ସମସ୍ତେ

ଅସଲରେ ନାହିଁ ସୁଖ।।4

ବନ୍ୟାର ଦାଉଟି ବାତ୍ୟାର ପ୍ରକୋପ

ସବୁ ହସି ହସି ସହେ

ଉଦ୍ୟମଟି ଥାଏ ସାହସ ହାରେନି

ପ୍ରାକୃତିକ ଦୁର୍ବିପାକେ।।5

ଏମିତି ବୀରତା ଅଦମ୍ଯ ସାହସ

ଦେଖିଛ କି କେଉଁ ଜନେ

ସେଇ ହିଁ ପ୍ରକୃତେ ବୀର ପୁରୁଷଟି

ତା’ ଗୁଣ ଗାଇବା ମନେ।।0