उठी उठी बा मुनिनंदना

उठी उठी बा मुनिनंदना । भक्त पातले दर्शना ।

त्यांची पुरवी तू कामना । पाही नयन उघडूनी ॥ध्रु.॥

उघडुनिया करुणादृष्टी । दासा धरी आपुले पोटी ।

नको येऊ देऊ हिंपुटी । घाली कंठी मिठी हर्षें ॥१॥

हर्षे तुझे पदी रंगले । दारागारा विसरले ।

निजदेहा न भुलले । विनटले निजभावे ॥२॥

निजभावे येता शरण । लपविसी का बा चरण ?

जेणे तरती दुष्टाचरण । मग मरणभय कैचे ? ॥३॥

नको करु निष्ठुर मन । शीघ्र देई आश्वासन ।

तू अससी करुणाघन । तापशमन करि शीघ्र ॥४॥

उठी उठी बा सद्‌गुरुराया । उठी उठी करुणालया ।

उठी उठी वा चिन्मया । निजमाया आवरी ॥५॥