शंकराची भूपाळी

धवळे भोळे चक्रवर्ती । धवळे अलंकार शोभती ।

धवलें धाम उमापती । सदा चित्तीं चिंतावा ॥ध्रु.॥

धवळ्या जटा गंगाजाळ । धवळा मयंक निर्मळ ।

धवले कुंडलांचा लोळ । शंखमाळ लोंबती ॥१॥

धवळी स्फटिकांची माळ । धवळे गळां उलथे व्याळ ।

धवळे हाती नर-कपाळ । धवळा त्रिशूळ शोभतसे ॥२॥

धवळा सर्वांगे आपण । धवळे विभूतीचे लेपन ।

धवळे गात्र धवळे वसन । धवळे वाहन नंदीचे ॥३॥

धवळे कैलास भुवन । धवळे मध्ये सिंहासन ।

धवळे शंकराचे ध्यान । दास चिंतन करीतसे ॥४॥