पाहुणा श्रावण.

आला पाहुणा पाहुणा
श्रावण माझ्या गावात
प्रफुल्ल आणि देखणा
मंगल भक्ती भावात.

नटला तो मांगल्याने
देव्हाऱ्यात फुलांसह
सजला तो सौंदर्याने
घरट्यात आईसह.

रोज वाचतो ग आता
पुराण तो बाबांसंगे
खाई नैवेद्य निराळे
आवडीने आईसंगे.

त्याला नुसते आवडे
पालेभाज्यांचे आहार
कसे व्रतवैकल्यांचे
सारे सोसतात भार.

आला पाहुणा पाहुणा
श्रावण माझ्या गावात
सारे किती आनंदात
एकपणे राहतात.