लेकीबाळी

सण दिवाळी ओवाळी

माहेरला लेकीबाळी

सासराच्या आयुष्याला

देती नव्याने झळाळी

सोस थकल्या जीवाचे

देती मायेच्या पदरी

माय घालते अमृत

विष पचाया जहरी 

माय बापाचे काळीज

तेंव्हा तुटते आतून

डोळे कोरडे लेकीचे

जेंव्हा भासते आटून

नव्या कोऱ्या पदराला

घाली जगण्याची आशा

मायलेकी एकीमेकी

बोली भावणांची भाषा

घडीभर गोडधोड

घेती देती जीवाजड

लेकं दिसावी हसरी

देवा मायेचं साकडं

देतो दिवाळीचा सण 

आनंदाची ओवाळणी

जीव सांडतो भरतो

सुख दुःख मनोमनी