एकदा स्त्री होऊन बघ

बेभान झालेल्या माणसा

एकदा माणूस होऊन बघ

खूप गाजवला पुरुषी हक्क

एकदा स्त्री होऊन बघ

छळतो तिला पावलोपावली 

तरीही तुझी तीच माऊली

नऊ महिने तुला पोटात ठेवते 

ही दुनिया तुला तीच दावते 

तिच्यासारख्या प्रसवकळा 

अन् वेदना सोसून बघ

खूप गाजवला पुरुषी हक्क 

एकदा स्त्री होऊन बघ

अपमान तिचा नित्य करतो 

अत्याचाराचे बाण मारतो

दासी समजून पायी तुडवतो 

स्वातंत्र्य तिचे तूच दडवतो

तिच्यासारखे गुलामीच्या 

आगीत होरपळून बघ 

खूप गाजविला पुरुषी हक्क 

एकदा स्त्री होऊन बघ 

काचेसारखं देहाला जपते 

पावित्र्याच्या पडद्याआड लपते 

तरीही लचके तोडले जाती 

अस्तित्व तिचे गाडले जाती 

पापी नजरा तिला घुरती

त्या डोळ्यांचा वार झेलून बघ 

खूप गाजवला पुरुषी हक्क 

एकदा स्त्री होऊन बघ 

सुख तिचे हिरावून घेतो

जिवंतपणी यातना देतो 

बाजारी तिची किंमत लावून 

फेकतोस तिला नरकात नेऊन 

हृदयाचे लाखो तुकडे तिच्या 

मरण्याआधी जोडून बघ 

खूप गाजवला पुरुषी हक्क 

एकदा स्त्री होऊन बघ