പരേതന്റെ കുറിപ്പുകൾ

ദൈവമേ കൈതൊഴാം, ഞാനൊരു മാസ്കിട്ടതെന്തൊരതിശയം !

അല്ലെങ്കിൽ

 ബസിലും ട്രെയിനിലും തുമ്മിയും തുപ്പിയും

അവരൊരു കൊറോണ വരുത്തിയേനെ !

 

ദൈവമേ കൈതൊഴാം

നീ എന്നെയറിയാത്തതെന്തൊരതിശയം !

അല്ലെങ്കിലീ ദീർഘയാത്രയിലെന്നെ നോക്കാതെ നീ വാട്ട്സാപ്പിലാഴത്തിൽ മുങ്ങിയേനേ 

ദൈവമേ കൈതൊഴാം ,ഞാനൊരു 

പെൺകിടാവല്ലാത്തതെന്തോരതിശയം !

അല്ലെങ്കിലവരുടൻ പിന്നാലെ വന്നെന്നെ 

ഏതോ പുഴയിലൊഴുക്കിയേനേ!

ദൈവമേ കൈതൊഴാം ഞാനൊരു ടീച്ചറല്ലാത്തതെന്തോതിശയം അല്ലെങ്കിലവാരെന്റെ കണ്ണുവെട്ടിച്ചങ്ങ്

 കോപ്പിയടിച്ചു ജയിച്ചേനേ.

ദൈവമേ കൈതൊഴാം ഞാനൊരു പാർട്ടീലുമില്ലാത്തതെന്തൊരതിശയം !

അല്ലെങ്കിലവരെന്നെകൊന്നിട്ട് കൊല്ലത്തിൽ രക്തസാക്ഷിദിനം കൊണ്ടാടുമേ !!! 

ദൈവമേ കൈതൊഴാം ഈ സീബ്രാവരയിലൂടെന്നെ നീ

കൈപിടിച്ചെത്തിക്കു

അല്ലെങ്കിലവരെന്നെ തട്ടിത്തെറിപ്പിച്ച് 

കൂളിംഗ് ഗ്ലാസിട്ടു പാഞ്ഞേനേ! 

ദൈവമേ കൈതൊഴാം, ഞാനൊരു പടുകിഴവനല്ലാത്തതെന്തൊരതിശയം അല്ലെങ്കിലവരെന്നെയറിയാത്ത

 വഴിയിൽ വിട്ടറിയാതെയങ്ങു മടങ്ങിയേനേ. 

ദൈവമേ കൈതൊഴാം ഞാനൊരു പരേതനായതെന്തൊരതിശയം !!

അല്ലെങ്കിലവരെന്റെ പിന്നാലെ വന്നിട്ട് 

തീയിട്ട് ചുട്ടങ്ങു കൊന്നേനേ !!!.