તે શું હશે ?

મૌન તારા ગર્ભમાં ઘુંટાય છે, તે શું હશે ?

છંદમાં લયબધ્ધ થઇ સર્જાય છે, તે શું હશે ?

લાગણીની છોળ, જેને તરબતર કરતી હતી,

અર્થનાં અંધારમાં ખોવાય છે, તે શું હશે ?

લે કરી લે, શક્યતાનાં પારખાં, તારા મુજબ,

એ પછીથી જે થવાનું થાય છે, તે શું હશે ?

તારૂ હોવું એ પછી તો કામ ક્યાં લાગે મને ?

શ્વાસમાં જે સ્વાર્થ ભળતો જાય છે તે શું હશે ?

જો ન હો સગપણ કશુંપણ આપણી વચ્ચે હવે,

લાજથી જે આંખ ઢળતી જાય છે તે શું હશે ?

શાંત દરિયો, શ્યામ વાદળ ને સ્વપ્ન મધરાતનું.

ઝંખના તારી જ સઘળે થાય છે તે શું હશે ?