માવડી તો સિંહણની જાત

મારી બૈ, એલી સૈયર માવડી તો સિંહણની જાત !

ધરવાને અવતાર વિધાતાને પણ આવવું પડે જ્યાં, એવી એની કૂખની તાકાત !

મારી બૈ, એલી સૈયર માવડી તો સિંહણની જાત ! 

ગોપીઓને ઘેલો કરતો, રાત દહાડો લીલા કરતો,

ગીતાના ઉપદેશ દેતો, એક ટેરવે ચક્ર ધરતો,

પૂછજે રે સખી એ માધવ મળે તો, વિના જશોદા તારું શું થાત ?

મારી બૈ, એલી સૈયર માવડી તો સિંહણની જાત !

ધર ધર ધરા ધ્રૂજાવે, સિંહને બાથી નવરાવે,

થર થર શત્રુ હંફાવે, એવા એવા શૂરવીર પાકે,

પૂછજે રે સખી એ વીરલાઓને, સંભરાવજે બાળપણની વાત,

સોડમાં કોની લપાઈ જતાં ? થતી જ્યાં જરાક અમથી રાત !

મારી બૈ, એલી સૈયર માવડી તો સિંહણની જાત !