હું અને તું

ઉદરમાં ખીલ્યો આજ એક અંશ મારો,

ઉતારો હેઠો હિંચકો, હવે પારણું બંધાવો,

પીડા ભેગો હરખાવતો, તું લાતે લાતે,

પોઢે તું પછી પોઢું હું નિરાંતે !

પ્રસૂતિની પળે જીવ સાતમે કોઠે ઉલાળ્યો,

હર્ષ કેરા અશ્રુ સંગ હૈયે વળગાડ્યો,

પારણીયે ઓવારણાં ઉતારું, હું વારે વારે,

પોઢે તું પછી પોઢું હું નિરાંતે !

ઘૂંટણીયા ભૂલી ઝાલી આંગળી તું ચાલતો,

છૂટે જો હાથ, તો સાડલો મારો ઝાલતો,

માં માં પોકારતો, તું વાતે વાતે,

પોઢે તું પછી પોઢું હું નિરાંતે !

તારલા સમી ચમકી ઊઠતી તારી આંખો,

ભાળી મને દોડી, સોડમાં તું સમાતો,

પાંપણો બાંધીને તાકતી, હું રાતે રાતે,

પોઢે તું પછી પોઢું હું નિરાંતે !