કોરો કાગળ

કોરા કાગળ જેવું મન હતું,

થયું શ્રી સવાથી શરૂઆત કરું,

પછી હળવે હાથે,

સ્પંદનોના પ્રતિબિંબ ઉતારું

કોરા કેન્વાસ પર.

યાદોમાં છવાયેલ એ છબી,

પેન્સિલના આડા ઉભા રેખાંકને દોરું ,

હળવેથી સપનાના રંગો ઉમેરું.

કદાચ...

આ શક્ય બનત,

અવાવરું વાવોમાં,

નીર છલકાયા,

કાગળ, કેન્વાસ રંગ બધું જ

એક સાથે થયું કોરું.

પણ...

ભીતરે ખાલીપો ખખડે, 

ત્યાં એક સંવેદન દટાયું,

કદાચ એ કાગળ

કેન્વાસ પર ફરી છવાઈ જશે,

કે, કાગળની નિયતિ,

કોરી જ કોરી ?