ପ୍ରକୃତି
ପ୍ରକୃତି
"ମୋତେ ଟିକେ ରହିବାକୁ ଦିଅ ଏକା"
ସ୍ନାୟୁ ମାନଙ୍କର ପ୍ରବଳ ଚିତ୍କାର |
ବାହାରକୁ ବାହାରି କ୍ରୋଧ ରୂପ ନେଇ |
ଉଛୁଳି ପଡେ କେବେ ପ୍ରିୟଜନଙ୍କ ଉପରେ,
ନିଜ ଆଉ କାହା ଅପାରଗ ପଣିଆକୁ କୋଷି
ତ କେବେ ଶବ୍ଦରେ ବରଷି ବରଷି |
ସାମାନ୍ୟ କଥାରେ ଅଶ୍ରୁ ଧାଇଥାନ୍ତି
ଚିବୁକ ତଳକୁ, ଲୁହା ସମ କଠିନ ଆତ୍ମବିଶ୍ଵାସ
ପାଲଟେ ଲବଣୀ କୋମଳ ......
ନ କରି ଭ୍ରୂକ୍ଷେପ ସମସ୍ତଙ୍କ କୌତୁହଳୀ ଆଖିକୁ |
କିଛି ଦିନ ପରେ ସ୍ନାୟୁ ସବୁ ସ୍ଥିର,
ନାହିଁ ଚାପା ଉତ୍ତେଜନା କି ଅନ୍ତରାତ୍ମା ଯୁଦ୍ଧ
ଠିକ-ଭୁଲ ଓ 'ଇଗୋ'ର ପରଖ |
ମନଟା ପାଲଟେ ହଠାତ ଶାନ୍ତ ଉପତ୍ୟକା
ମାସଟାରେ କେଇଦିନ ଏମିତି ବିଭ୍ରାଟ ଭିତରେ
ବଦଳେ ରହସ୍ୟମୟ ବ୍ୟକ୍ତିତ୍ଵ |
ଜାଣି ଶୁଣି ବି ଭାବନାର ଖିଅ ,
ପ୍ରତିକ୍ରିୟାର ଉଜାଣି ବହୁଥିବା ସୁଅ
ବଦଳେଇ ପାରେନା ତା' ରାସ୍ତା |
କିଏ କଣ ସତରେ ବୁଝିବାକୁ ଚେଷ୍ଟା କରେ ,
ପ୍ରକୃତି ନିୟମରେ ବନ୍ଧା
ନାରୀର ଏ ଅବୁଝା ପ୍ରକୃତି ଟିକୁ ?