ତୁମେ ତ ବ୍ରହ୍ମାଣ୍ଡପତି
ତୁମେ ତ ବ୍ରହ୍ମାଣ୍ଡପତି
ପତିତପାବନ ଶ୍ରୀ ମଧୁସୁଦନ ଅଖିଳବ୍ରହ୍ମାଣ୍ଡ ପତି,
କରୁଛି ଗୁହାରୀ ଶୁଣ ଚକ୍ରଧାରୀ ଫେଡ଼ ବାରେ ମୋ ଦୁର୍ଗତି |
ମୁଁ ଯେ ଅତି ନିଃସ୍ୱ ଦୀନହୀନ ପ୍ରଭୁ ଜାଣିନାହିଁ ମନ୍ତ୍ର ଜପ,
ଶିଖିନାହିଁ ସ୍ତୁତି ପୂଜା ଆରାଧନା କରିନାହିଁ କିଛି ତପ |
କେବଳ ଡାକୁଛି ତୁମକୁ ନାଥ ହେ ଆଶାର ଆଲୋକ ଜାଳି,
ଆହେ କୃପାସିନ୍ଧୁ ଦୀନଜନ ବନ୍ଧୁ ଘେନ ମୋର ପୁଷ୍ପାଞ୍ଜଳି |
ସର୍ବଶକ୍ତିମୟ ହେ ପରମେଶ୍ୱର ଘେନାକର ମୋ ଗୁହାରୀ,
ତୁମ୍ଭେ ମୋ ମାଲିକ ଜୀବନ ଦାୟକ ମୁଁ ତୁମ୍ଭ ପାଦ କିଙ୍କରୀ |
ତୁମ୍ଭବିନୁ ନାଥ ହେବି ମୁଁ ଅନାଥ ଆହେ ଅନ୍ତର୍ଯ୍ୟାମୀ ହରି,
ଅନ୍ତର ର ଦୁଃଖ ବୁଝି ବି ନ ବୁଝ ହୁଅ ପଥର କିପରି |
ଦେଖି କି ପାରୁନ ହେ ଜଗମୋହନ ତୁମ୍ଭ କୃପାବିନା ଏକା,
ଭାସୁଛି ଆଜି ମୁଁ ଦୁଃଖ ସାଗର ରେ କେହି ନାହିଁ ମୋର ସଖା |
ମୁଁ ମୁଢ ଅଜ୍ଞାନୀ ବୁଦ୍ଧିଜ୍ଞାନ ହୀନ ଅଟେ ବଡ଼ ମହାପାପୀ,
ଆହେ ବିଶ୍ୱପ୍ରାଣ ଯାଉ ଏ ପରାଣ ତୁମ୍ଭନା ଜପିଜପି ।