ଷଡ଼ଯନ୍ତ୍ର

ଷଡ଼ଯନ୍ତ୍ରେ ସଢ଼େ ନିରୀହ ମଣିଷ

      ହରାଇ ଧନ ଜୀବନ ,

ଷଡ଼ଯନ୍ତ୍ର କରି ଜିତି ହୁଏ ରାଜ୍ୟ

      ଜିତି ହୁଏ ନାହିଁ ମନ ।

ଷଡ଼ଯନ୍ତ୍ର କରି ସାହୁକାର ବୁଢ଼ା

      ଦାଣ୍ଡରେ କରେ ଭିକାରି ,

ଲୋଭ ଗ୍ରାସି ଗଲେ ସ୍ନେହ ତୁଟି ଯାଏ

      ଭାଇ ତ ସାଜେ ଭଗାରି ।

ଷଡ଼ଯନ୍ତ୍ର କରି ପୂର୍ଣ୍ଣ ହେଲେ ବାଞ୍ଛା

       ବନ୍ଧୁକ ଦେଖାଏ ବନ୍ଧୁ ,

ଲଙ୍ଘି ନପାରିଲେ ଦେଶ, ରାଜ୍ୟ ସୀମା

       କରାୟତ କରେ ସିନ୍ଧୁ ।

ଷଡ଼ଯନ୍ତ୍ର କରି କୌରବ ନୃପତି 

       ପାଣ୍ଡବଙ୍କୁ କଲେ ଦାସ ,

ଅହଂକାରୀ ହେଇ ସୀମା ଲଙ୍ଘି ଗଲେ

       ଶେଷେ ହେଲେ ସର୍ବନାଶ ।