ସମାଧାନ
ସମାଧାନ
ଏପାଖେ ଅନ୍ଧାର ସେପାଖେ ଆଲୋକ
ଅନ୍ଧାରକୁ କିବା ଭୟ।
ପାଦେ ଯାଇ ବନ୍ଧୁ ଦେଖ ଏ ଜଗତ
କେତେ ଯେ ଆଲୋକମୟ।
ଏପାଖେ ନିରାଶା ହେଲେ ସେପାଖରେ
ଆଶା ହାତ ଠାରି ଡାକେ।
ପାଦେ ନ ଯାଇଣ ନିରାଶାରେ କିଆଁ
ରହିବା ବନ୍ଧୁ ଏପାଖେ !
ଏପାଖେ ବନ୍ଧନ ସେପାଖେ ମୁକତି
ବନ୍ଧନେ କିମ୍ପା ରହିବା।
ପାଦଟିଏ ଯାଇ ମୁକତିର ସ୍ଵାଦ
କିମ୍ପା ବନ୍ଧୁ ନ ଚାଖିବା !
ଏପାଖରେ ଅଛି ଅବିଶ୍ବାସ ସିନା
ସେପାଖେ ଅଛି ବିଶ୍ଵାସ।
ପାଦଟିଏ ଗଲେ ବିଶ୍ଵାସରେ ବନ୍ଧୁ !
ମିଳିଯିବେ ଜଗଦୀଶ।
ଏପାଖେ ଅବିଦ୍ୟା ହେଲେ ସେପାଖରେ
ବିଦ୍ୟା ବୁଣେ ଜ୍ଞାନାଲୋକ।
ଏକ ପାଦ ବନ୍ଧୁ ବଢ଼ାଇଣ ଦେଖ
ଜାଗିବ ସୁପ୍ତ ବିବେକ।
ଏପାଖେ ମରଣ ସେପାଖେ ଜୀବନ
ସେପାଖେ କିଆଁ ନ ଯିବା।
ଏପାଖରେ ରହି ମୃତ୍ୟୁର ଭୟରେ
କିମ୍ପା ସଦା ମରୁଥିବା !
ଏପାଖ ସେପାଖ ମଝିରେ କେବଳ
ଏକପାଦ ବ୍ୟବଧାନ।
ପାଦଟିଏ ଗଲେ ଜୀବନ-ପ୍ରଶ୍ନର
ହୋଇଯିବ ସମାଧାନ।