Library
Profile
ପ୍ରେମାନଳ
ପ୍ରେମାନଳ
ହତାଶାର ଦୁଃଖରେ ହାରି ଯାଇଥିବା
ହୃଦୟର ହସ
ଅଚିହ୍ନା ରାସ୍ତାରେ ହଜିଥିବା
ବାଟୋଇର ଶୋଷ
ଅପେତଭରାର ଜୀବନ
ଆଉ କିଛି ଅବଶୋଷ ...
ଏଇତ ! ପ୍ରେମର ଅବଦାନ ।
ତୁମ ଓଢ଼ଣା ତଳର ଝଡି ବର୍ଷାରେ
ସୃଷ୍ଟି ହେଉଥିବା କୁତ୍ରିମ ଝର ,
ଟୋପିଟୋପି ବର୍ଷା ବୁନ୍ଦାରେ
ଅବ୍ୟବସ୍ଥିତ ଅଳତା ଗାର
ଲୋତକ ବନ୍ୟାରେ ରକ୍ତେଇ ଯାଇଥିବା
ରକ୍ତାଭ ଓଠର ଉଜୁଡା ତଟ ,
ଆସନ୍ନ ଆଗନ୍ତୁକର ଉପସ୍ଥିତିରେ ଉପେକ୍ଷିତ
ଲୋତରା ସ୍ମୃତିର ବତୁରା ମଲାଟ
ଏଇତ, ପ୍ରେମର ଅବଶିଷ୍ଟ !
ଅଲଖେଣା ଅର୍ଥହୀନ ବୟସରେ
ନିଦାଘର ଟିପଚିହ୍ନ ,
ଉଛିଷ୍ଟ ଯୌବନର ଗୁମୁରା
କାନ୍ଦଣା
ସାତସିଆଁ ମନପାଇଁ ଆଠମାଣ
ଲୁହର ସାନ୍ତ୍ବନା ,
ଖୁସିଦବା ର ଅନ୍ବେଷଣେ
ଲହୁଲୁହାଣ ହୋଇ ଧାଉଁଥିବା
ଧର୍ଷିତ ଧମନୀର ଧର୍ଯ୍ୟର ବେଦନା
ଏଇତ, ପ୍ରେମର ଗରିମା !
ଅଭିମାନର ଚାଦର ଘୋଡେଇ
ଦୁନିଆକୁ ପଛକରି
ନିଘୋଡ଼ ନିଦରେ ଶୋଇବା
ଅବା, ଦାନ୍ତ କାମୁଡି ରକ୍ତଚାଉଳ ଚୋବେଇ
ବର୍ଦ୍ଧିତ ବାର୍ଦ୍ଧକ୍ୟ ର ବିଷ ପାନ କରିବା
ଅଥବା , ବିଜ୍ଞାପନ ଟିଏ ଦବା
ରଙ୍ଗ : ଲାଲ
କେଶ : ଧୂସର
ଓଠ : ପେଜୁଆ
ହାତରେ ପ୍ରତାରଣାର କଟା ଚିହ୍ନ
ଜଣାଇବାକୁ ଅନୁରୋଧ ,
ଯଦି କାହାକୁ ଜଣା
ମୋ ହଜିଥିବା ହୃଦୟର ଠିକଣା
ଏଇ କ’ଣ ପ୍ରେମର
ପାରିଲା ପଣିଆର ପାଉଣା ?
