ଖରାଶେଷ ଶାଏରୀ

 ଖରାଶେଷ  ଶାଏରୀ

                               ମାନମୟୀ ରଥ 

    

ହୋଇପାରେ ଆକସ୍ମିକ ଲଘୁଚାପ

ଅନେକ ପ୍ରସ୍ଥାନ ନେଇ

ଫୁଲିପାରେ ପାଣିର ଉଚ୍ଚତା

ଖୋଲିପାରେ ପାହାଡ଼ର ଛାତି

ସହସ୍ର ମୁକୁଟ ପିନ୍ଧି

ପବନ ବି ଫାଟି ପାରେ ପରସ୍ତ ପରସ୍ତ ।

 

         ***

ସର୍ଜିବାର କୋହରେ

ଜକେଇ ଯାଇପାରେ ବାଦଲ 

ନିଗିଡି ଆସିପାରେ 

ମେଘଖଣ୍ଡର ଲୋତକ ଅଞ୍ଜଳି,

ଭସେଇ ବି ଆଣିପାରେ 

ପ୍ରସ୍ତୁତ ଅପ୍ରସ୍ତୁତ ସମସ୍ତ ଶାଏରୀ

ଲୟହୀନ ଲୋରି ।

 

        ******        

 

ଏଇ ମାତ୍ର ଭାଙ୍ଗିଯିବ

ଡହ ଡହ ଡହକର ତୋଡ଼

ପ୍ରତିଟି ଶୁଖିଲା ପାଖୁଡା

ଜନ୍ମ ଦେଇପାରେ 

 ଓଠ ଭର୍ତ୍ତି ହସ

ଲକ୍ଷ ଲକ୍ଷ ଗୋଲାପି ସକାଳ।

                                   

 

ଗୌରୀଶଙ୍କର ପବ୍ଲିକ ସ୍କୁଲ, ବୌଦ୍ଧ ।