ଦ୍ଵିତୀୟ ପାଳି

କୁଣ୍ଡରେ ରୋଗା ଗେଣ୍ଡୁ ଚାରା ଟେ 

ବାପା ହାଟରୁ ଆଣି ରୋପିଲେ ଥାଟେ

ଫୁଲଟେ ଫୁଟିଲା ଦିନେ ମୁରୁକି

ଅନୁଭବ ହେଲା 

ମହକିତ ପଲ୍ଲବିତ ପୃଥିବୀ ସରିକି

ଚଗଲା ପବନ ନିତି ଚୁମି ଯାଏ

ପ୍ରେମୀକ ଭଅଁର ନିତି ଛୁଇଁ ଯାଏ

ଚହଲି ଦୋହଲି ଯାଏ 

ଫୁଲେଇ ଫୁଲର ଫୁଲମନ

ଛନଛନ କନକନ ମନ ଭପବନ

ଏହା କ'ଣ ଯୌବନର ଦ୍ୱିତୀୟ ପାଳି ଚୟନ

ଚନ୍ଦନ ଚର୍ଚ୍ଚିତ ଯାଦୁକରୀ ସମ୍ବୋହନ ?

ବୋଉ ଲଗେଇ ଥିଲା 

ଟଗର ଗଛର ଡ଼େମ୍ଫେ ଡାଳ

ଝୁମୁକା ନାଲି ମନ୍ଦାରରୁ କେଇ ପଳ

ଗୋବର ମୁଣ୍ଡରେ ଟୋପି କରି 

ଗାତ ଖୋଳି ପୋତିଥିଲା ସହଳ ଚଞ୍ଚଳ

ଆଣିଥିଲା ଅଜା ଘରୁ ଏ ସନ

କହୁଥିଲା ତାର ପିଲାଦିନର ସାଥି ପ୍ରୀୟଜନ

ସକାଳୁ ଫୁଲ ତୋଳାବେଳେ 

କେତେ ମୃଦୁ ଗୁଞ୍ଜନ 

ଅତୀତ ସଂପର୍କର କାୟମନ

ପାଣି ପାଇ ଦିନୁ ଦିନ

କଞ୍ଚେଭଲା ଗଜୁରିଲା ଖେଳି 

ଡାଳ ପତ୍ର ଡେମ୍ଫ ଦାନ

ସବୁଜ ବିପ୍ଳବର ଅନନ୍ୟ ସନ୍ଦର୍ଶନ

ଅନୁଭବ ହେଲା

ବୋଉ ଆଜିକାଲି ଗୁଣୁ ଗୁଣେଇ 

ମନେ ମନେ ଗାଉଛି

ମହୁ ମାଛି ପରି ବ୍ୟସ୍ତତା ଭିତରେ

ବି ଖୁସି ଝଲସୁଛି

ଧଳା ବାଳ ଦିଶୁଥିଲେ ବି ମଥାରେ

ବୟସର ଅପରାହ୍ନ ମୁଁହରେ ଚେହେରାରେ

କିଛି ଫରକ ପଡୁନି

ବରଂ 

ଖୁସିର ଝଲକ ଚାଲିରେ

କାନ୍ତିର ମହକ ଖାଲିରେ

ମସ୍ତିର ଫଳକ ବାଣିରେ

ତୃପ୍ତିର ସନ୍ତକ ଠାଣିରେ

ଶାନ୍ତିର ସ୍ତବକ ରନ୍ଧାରେ

ହସର ଚପଳ ଛନ୍ଦାରେ

ଏହା କ'ଣ ଯୌବନର ଦ୍ୱିତୀୟ ପାଳି ଆଗମନ 

ପ୍ରକୃତିର କୋଳେ ମେଳେ

ଖିଲି ଖିଲି ଖେଳେ ଆସକ୍ତ ଶିହରଣ ।