ବିସ୍ମିତ ଶ୍ରାବଣ

ଚାହିଁଛୁ ତୁମକୁ ଆଗୋ ବର୍ଷାରାଣୀ 

ପଲକହୀନ ନୟନେ 

ମୁକୁଳିତ ହୁଅ ଝରାଅ ପିୟୁଷ 

ପୂର୍ଣ୍ଣକର ବିତରଣେ 

ହଜିଯାଇଛ କି ନିଦାଘ ପ୍ରେମରେ 

ନିଜ ବାଟ ଭୁଲି ଯାଇ 

ଆସିଲନି ଫେରି ସେ ପ୍ରେମ ରାଇଜୁ 

କର୍ତ୍ତବ୍ୟ କରିବା ପାଇଁ 

ଅପସରି ଆସ ଅଭିମାନିନୀ ଗୋ 

ହେଉ ଅନୁଭବ ତୁମ 

ସମର୍ପିତ ହେଉ ସକଳ ବାସନା 

ହୁଅ ତୁମେ ପୂର୍ଣ୍ଣକାମ 

ବିକଶିତ ହେଉ ହୃଦୟ ତୁମରି 

ବରଷା ପୀରତି ଦାନେ 

ଖୋଜୁଛୁ ବ୍ୟାକୁଳେ ହୁଅ ଆବିର୍ଭାବ 

ବର୍ଷାଧାରା ସମ୍ଭାଷଣେ 

ପ୍ରସ୍ଫୁଟିତ ହେଉ ସବୁଜ ଶ୍ୟାମଳ 

ଘେନି ନବ ଯଉବନ  

ଅଙ୍ଗେ ଅଙ୍ଗେ ତୁମ କାମନା ଜୁଆର 

ପୁଲକିତ ତନୁମନ 

ପୂର୍ଣ୍ଣତାଭରି ସବୁରି ପ୍ରାଣରେ 

ପିପାସା ବୁହାଇ ମନେ 

ନିଦାଘ ଜ୍ୱଳନ ଅପସରି ଯାଉ 

ତୁମ ସୁଧା ବିତରଣେ 

କରୁଛୁ ସ୍ୱାଗତ ହୃଦୟ ବେଦୀରେ 

ଝରିଯାଅ ଅନର୍ଗଳେ 

ଜନେ ହଜିଯାନ୍ତୁ ପରିତୃପ୍ତ ହ୍ୱନ୍ତୁ 

ତୁମ ଅମୃତର ଆସ୍ୱାଦନେ