ବିଶ୍ଳେଷଣ

ଟଳମଳ ଦଦରା ନାଆରେ

ଜୀବନ ବାହୁଛି ନାଉରୀ ,

ଢେଉ ସାଥେ ଖେଳେ

ସାରା ଦିନ,

ସୁଦୁ ପେଟ ଚାଖଣ୍ଡକ ପାଇଁ 

ସୁଖ, ଦୁଃଖ, ପ୍ରିୟାକୁ ପାଶୋରି ।

ପଚାରିଲେ ହସି ଦେଇ କହେ-

ଘରଣୀ ମୋ ଟଳମଳ 

ବିଦେଶୀ ଭାଷାରେ

ପୁଅ ମୋର ଟଳମଳ 

ବିଦେଶୀ ନିଶାରେ

ତମେ ବି ତ ଟଳମଳ 

ସାହେବ ଢାଞ୍ଚାରେ

ବାବୁ! ଦେଶଟା ତ ଏଇ ମତେ

କିବା କଥା ପଚାରିଲ ମୋତେ ।

ପୃଥିବୀ ତ ଟଳମଳ 

ପରମାଣୁ ବୋମାର ଭୟରେ

ସାମ୍ପ୍ରଦାୟିକ ଦଙ୍ଗାର ଡରରେ ।

ଆକାଶ ତ ଆକ୍ତାମାକ୍ତା

କାର୍ଖାନା ଧୂଆଁରେ,

ଇତସ୍ତତଃ ଜନ ପ୍ରାଣି

ଅଂଶୁର ନିଆଁରେ ।

ଟଳମଳ ଇନ୍ଦ୍ରାସନ 

ଦେବତାଏ ହୋନ୍ତି ଆତଙ୍କିତ 

ଟଳମଳ ମୋ ରାଇଜ

ପ୍ରଭୁ ଜଗନ୍ନାଥ ।