ବିଶ୍ଳେଷଣ

ଶରାହତ

ଶାନ୍ତିର କପୋତ

କଣ୍ଠ ତାର ରୁଦ୍ଧ

ଗାଉ ନାହିଁ ଗାଉ ନାହିଁ

ସେ ସ୍ବାଧୀନ, ଶାନ୍ତିର ସଂଗୀତ ।

ନିକ୍ଷେପିଲା ଶର ଯେହୁ

ବର୍ବର ଶବର

ଦଣ୍ଡିବାର ଶକ୍ତି ନାହିଁ

ଦଣ୍ଡାଧୀଶ ତା' ଠୁଁ ନିଷ୍ଠୁର ।

ନିର୍ଭୟରେ ହୋଇ ଅଛି ଛିଡ଼ା,

ନାହିଁ ନାହିଁ ଦଣ୍ଡ ବିଧି

ନାହିଁ କାଠଗଡ଼ା

ଶୁଣିବ କେ କପୋତୀର

ଆତୁର କ୍ରନ୍ଦନ

କହିବ କାହାରେ,

ଗୌତମ ତ ମୋହାସକ୍ତ

ଶବରୀ ମାୟାରେ ।

କପୋତ ତ ପ୍ରାଣ ଦେଲା

କପୋତୀର ନାହିଁ ତିଳେ ମୁକ୍ତି,

ଏଇମିତି ଶୋଷିତା ଲୁଣ୍ଠିତା

ମର୍ତ୍ତ୍ୟର ଯୁବତୀ ।