ବିଶ୍ଳେଷଣ

ଯଦି ପ୍ରମାଣିତ ହେଇ ପାରେ

ବୀଜଗଣିତରେ

ଚାରି ସମାନ ପାଞ୍ଚ

ତେବେ ଆଖି ଦେଖୁଥିବା

ସମସ୍ତ ଦୃଶ୍ୟ ସତ ନୁହେଁ

କିଛି କିଛି ମିଛ ।

ଯେମିତି,ଶୀତ ଦିନେ ଅପରାହ୍ନେ

ଦିଗ୍ବଳୟେ ଦିଶୁ ଥିବା

ଧୂଆଁ ଆସ୍ତରଣ

ଧୂଆଁ ନୁହେଁ, କୁହେଳିକା

ସେଠି ନଥାଏ ନିଆଁ,ନଥାଏ ଧୂଆଁ

ଏଇମିତି ସତ ମିଛ ମାୟାର ଦୁନିଆଁ ।

ବାମ ଆଖି ଯାହା ଦେଖେ

ଦେଖେନି ଦକ୍ଷିଣ,

ସତ ମିଛ ଜାଣି ପାରେ

ତୃତୀୟ ନୟନ ।

ଭାଇରେ ଏ ଆଖିକୁ

କରନି ବିଶ୍ବାସ,

ବିବେକ ଖଟାଇ ଦେଖ

ତୃତୀୟ ନୟନେ

ସୁନା କଳସୀର ପାଣି

ଅମୃତ ନା ବିଷ ।