ଭୟ ନାହିଁ ବେନିଭାଇଙ୍କୁ

ଭୟ ନାହିଁ ସେଇ ବେନି ଭାଇ ,ବନମାଳୀଙ୍କୁ ବଳରାମଙ୍କୁ

ପୁତନା, ଶକଟା ମାରି

ତାରି ଜମଳାର୍ଜୁନଙ୍କୁ

ଭୟ ନାହିଁ ।

ଖାଉଥିଲେ ଖୋଳି ମାଟି 

ମାଆ ଖୋଲିଦେଲେ ପାଟି

ଦେଖିଲେ ଭୂବନ ତିନି 

ଜଗତ ବିଶ୍ଵରୂପକୁ ।

ନନ୍ଦ ରାଣୀ ଆକଟ କରନ୍ତି

ପ୍ରାଣଧନକୁ, ଧରି କାନକୁ

ଛନ୍ଦ ନ ପାରନ୍ତି ଜାଣି 

ବାନ୍ଧନ୍ତି କଳାକାହ୍ନୁଙ୍କୁ

ଭୟ ନାହିଁ ସେଇ ।

ଗୋପାଳ ପୁଅଙ୍କ ସାଙ୍ଗେ

ଧୂଳି ଉଡେ ଖେଳି ଦାଣ୍ଡେ

ଚୋରାନ୍ତି ସର , ଲବଣୀ 

ଭାଙ୍ଗି ଦହି ହାଣ୍ଡିକୁ

ନନ୍ଦଦୁଲାଳ ନିନ୍ଦା ଶୁଣାନ୍ତି

ଯଶୋମତିଙ୍କୁ, ନନ୍ଦରାଜାଙ୍କୁ

ଅଝଟ ପଣକୁ ସହି

କୋଳାନ୍ତି ରାମକୃଷ୍ଣଙ୍କୁ

ଭୟ ନାହିଁ ସେଇ ।

ଘେନି ଗାଈ ଗୋଠ ବନେ

ଚରାଇଲେ ନିତି ଦିନେ

ବକାସୁର ବେକ ଭାଙ୍ଗି 

ଦଂଶି ପ୍ରଳମ୍ବା ଦର୍ପକୁ

ଭୟ ନାହିଁ ସେଇ ।