ଭକ୍ତିସାଗର

ଭକ୍ତିସାଗରରେ

ଯାଉଅଛି ବୁଡି

ତୁମରି ନାମକୁ ଗାଇ,

ଆହେ ଚକାଆଖି

ମୁହିଁ ନିରିମାଖି

କରୁଣାଆଶିଷ ଦେଇ

ଦିଅ ଭିଜାଇ l

ସାଗର ନଦୀର

ନଦୀ ସାଗରର

ପରିପୂରକ ହେ ନାଥ,

ତୁମ ବିନା ସାହା

କେ ଅଛି କୁହ ହେ

ସଂସାରସାଗରେ ପ୍ରଭୁ

ଦେଖାଅ ପଥ l

ପରମାତ୍ମା ତୁମେ

ଟିକି ଆତ୍ମା ମୋର

କି ଯଶ ତୁମର ଗାଇବ,

ପରଂବ୍ରହ୍ମ ସଙ୍ଗେ

ଏ ଆତ୍ମା ମିଶିବ

ଏତିକି ମିନତି

ମୋର ଘେନିବ l

ଭକ୍ତିମୟ ହୃଦେ

ଭକ୍ତିମୟ ଚିତ୍ତେ

ଭକ୍ତିସାଗରରେ ବୁଡି,

ମନପକ୍ଷୀ ମୋର

କରିଛିରେ ଆଶା

ଶ୍ରୀଅଙ୍ଗ ସେବିବ

ଯିବ ନୀଳାଚଳ ଉଡି l

ସଂସାରସାଗରେ

ବୁଡି ଯାଉ ଯାଉ

ଝଡ଼ଝଞ୍ଜା କେତେ ଆସିବ,

ଭକ୍ତିସାଗରରେ

ପ୍ରେମଅମୃତରେ

ବୁଡାଇ ଜୀବନତରୀ

ପ୍ରଭୁ ହେ ଉଦ୍ଧାରୀ ଦେବ l