ଭକ୍ତିପୁଷ୍ପ-୧୯

ଛଇ ଛଟକୀ

ନଯା' ଅଟକି

ପାହିଲା ରଜନି ଯିବା ଯମୁନା  

ଛନ୍ଦା ଚରଣ

ବଂଶୀ ବଦନ

ଦେଖିବାକୁ ନେତ୍ର ଆନମନା ।

ତ୍ରିଭଙ୍ଗୀ ଠାଣି

ବାଙ୍କ ଚାହାଣୀ 

ଅଧରେ ମୂରଲୀ କି ମନଲୋଭା 

ବାଙ୍କ ଚୂଳିଆ

ବନମାଳୀଆ

ମୟୂର ଚନ୍ଦ୍ରିକା ଆହା କି ଶୋଭା ।

ପୀତ ବସନ

ବଂଶୀ ବଦନ

ମଦନ ମୋହନ ଆହା ରୂପ କାନ୍ତି  

ଶୁଣଲୋ ସଖି

ଫେରେନି ଆଖି

ଦେଖି ଦେଲେ ଥରେ ମିଳେ ଲୋ ଶାନ୍ତି ।

ନକରି ଡେରି

ଆସ ବାହାରି

ମାଠିଆ କଳସୀ କାଖରେ ଧରି  

ପାରୁନ କି ଶୁଣି

ବଇଁଶୀର ଧ୍ୱନି

ରାଧା ରାଧା ବୋଲି ପକାଏ ହୁରି ।

ପାରୁନାହିଁ ସହି

ଏକା ଯିବି ଧାଇଁ

ଆସିଲେ ଆସ ନଆସିଲେ ନାହିଁ  

ଲୋଡ଼ା ନାହିଁ ପାଣି

ଲୋଡ଼ା ବେଣୁପାଣି

ନୟନ ଅଥୟ ଦର୍ଶନ ପାଇଁ ।