ଭକ୍ତି ପୁଷ୍ପ -୨

  

ଆସ ଗୋ ମୂରଲିଧାରୀ

ନିଶି ଗଲା ଅପସରି ,

ପାହିଲା ରଜନୀ ଯେଣୁ

ବଜାଅ ଗୋ ବେଣୁ ଥିରି ।

ଚନ୍ଦ୍ରସେଣା ଛନ୍ତି ନିଦେ

ଚେତା ନଥିବ ନଣନ୍ଦେ ,

ନଜାଣନ୍ତୁ ଶାଶୁ କିଛି

ଯିବି ମୃଦୁ ମୃଦୁ ପାଦେ ।

ମିଛରେ କଳସୀ ଧରି

ଗୋପ ଦାଣ୍ତ ହେଇ ପାରି ,

ଯାଏ ମୁଁ ଯମୁନା କୂଳ

ଦେଖିବି ଶ୍ରୀ ବଂଶୀଧାରି ।

ଅଣ୍ଟିରେ ଆଣିଛି ଖୋସି

ମନ ଫୁଲ ମିଶା ମିଶି ,

ଯତନେ ଦେବି କାହ୍ନୁରେ

କାଳେ ହେଇ ଯିବ ବାସି ।

ଉଛୁଳେ ଯମୁନା ନଈ

କାହ୍ନୁଙ୍କୁ ପାଖରେ ପାଇ ,

କଦମ୍ବ ଫୁଲେଇ ହୁଏ

ଦୋହଲେ ମୋ ମନ କଇଁ ।

କାହିଁରେ ଲାଗେନି ମନ

କାହ୍ନୁ ମୋ ଜୀବନ ଧନ ,

ତା ସାଥିରେ ଭାବ ମୋର

ଭକ୍ତ ଆଉ ଭଗବାନ ।

ଆସିବି ସହଳ ଫେରି

ପ୍ରୀତିରେ କଳସୀ ଭରି '

ସହି ଯିବି କଟୁ କଥା

ଛାତିକୁ ପଥର କରି ।

ଦେହ ଖୋଜୁ ନାହିଁ ଦେହ

କାହ୍ନୁ ପ୍ରେମେ ଖାଲି ମୋହ

ସହି ସହି ଅପବାଦ

ଶୁଖି ଯାଉ ମୋର ଲୁହ ।