ଭିଜା ମାଟି
ଭିଜା ମାଟି
ଆଦ୍ୟ ଆଷାଢ଼ର
ଭାରାକ୍ରାନ୍ତ ଆକାଶ,
ତୁହାକୁ ତୁହା ବର୍ଷା ସାଙ୍ଗକୁ
ଘୁଘୁ ବତାସ
ମହ ମହ ଭିଜାମାଟିର ମହକରେ
ମସଗୁଲ୍
ତରୁ ଲତା
ଜୀବ ଜନ୍ତୁ
କୀଟ ପତଙ୍ଗ
ଚାଷ ଚାଷୀ
ଏବଂ ସାଧବ ବୋହୂ ।
ମଝିରେ ମଝିରେ
ମୁଣ୍ଡଫଟା ଟାଣ ଖରା
ଦ୍ବିଗୁଣିତ କରୁଥାଏ
ଭିଜାମାଟିର ବାସ୍ନାକୁ ।
ଅଭାବି ଚଷା ପୁଅ ଛାତିରେ ଛନକା
ପେଟ ପାଟଣାର କଥା
ଚାଷ ହୁଡ଼ିଲେ ବରଷେ
ସାହୁକାର ର ସୁଧ
ମିଶି ଯାଏ ମୂଳଧନ ରେ ।
ମନକୁ ଟାଣ କରେ
ଫୁସୁରୁ ଫୁସୁରୁ ହେଇ
କ'ଣ ସବୁ କହି ଯାଏ
ହଡ଼ା ବଳଦ କାନରେ ।
ଭିଜାମାଟିର
ଭିଜା ଆହ୍ଲାଦରେ
ଖରାଦିନେ
ଖପରା ପାଲଟି ଯାଇ ଥିବା
ବଣି ମଳରୁ ଅଙ୍କୁରୋଦ୍ଗମ ,
ମନକୁ ଆମ୍ବିଳା କରେ ବନ୍ଧ୍ୟା
କରି ହୃଦୟଙ୍ଗମ ।
କଖାରୁ ଡଙ୍କରେ
ମାଳ ମାଳ ସାଧବ ବୋହୂ ପୋକ,
ସୁନୁଷୁନିଆଁ ଶାଗ ତଳେ
ସାଲୁବାଲୁ ଜୋକ,
ସଜନା ଗଛରେ ଭର୍ତ୍ତି ସଁବାଳୁଆ
ଲାଙ୍ଗୁଡ଼ି ପୋକରେ
ଅସ୍ତବ୍ଯସ୍ତ ନାଳ, ନାଳୁଆ ।
ଭିଜାମାଟି ମୋହ
ଭିଜା ମାଟିର ମହ
ଆଉ ତା' ସହ
ଭିଜା ମନ
ଭିଜା ଭିଜା ସ୍ବପ୍ନ ଆଉ
ଭିଜା ଯୌବନ
କଅଁଳିଆ ଘାସ ଦେଖି
ଛନଛନ ଝିଣ୍ଟିକା
ନୁଆଣିଆଁ ଚାଳ ଘରେ
କନକନ ପ୍ରେମିକା ।
ଆନମନା ଭୁଆସୁଣୀ
ଅମାନିଆଁ ବୀଥିକା
ଚପଳା କିଶୋରୀ ରୁଷି
ସାଉଁଟୁଛି କାଗଜର ନଉକା ।