ଭାରି ଭଲ ଲାଗେ

ଭାରି ଭଲ ଲାଗେ 

ବୋଉ ମୋର ଯେବେ 

     ଚାହିଁ ବସିଥାଏ ବାଟ 

ମୋ ମନର କଥା 

ସହଜେ ବୁଝେ ସେ 

     ଖୋଲିବା ଆଗରୁ ଓଠ ।

ଭାରି ଭଲ ଲାଗେ 

ମୋ ବୋଉର ଗେଲ୍ଲ

    ବୁଝେ ମୋର ଭଲମନ୍ଦ 

ତା ମିଠା କଥାରେ 

ଭରିଯାଏ ମୋର 

    ବିରସ ମନେ ଆନନ୍ଦ ।

ଭାରି ଭଲ ଲାଗେ 

କିଏ ଯଦି କେବେ 

    କରଇ ମୋତେ ଆକଟ 

ସେନେହ ଡୋରିରେ 

ସତେ ବାନ୍ଧି ଥାଏ 

   ପୁରିଯାଏ ମୋର ପେଟ ।

ଭାରି ଭଲ ଲାଗେ 

ମୋ ବାନ୍ଧବୀ ଯେବେ 

   ଦିଏ ଛୋଟ ଉପହାର 

ମିଳିଯାଏ ମୋତେ 

ସ୍ବର୍ଗୀୟ ଆନନ୍ଦ 

    ଲାଗେ ଅତି ଆପଣାର ।

ଭାରି ଭଲଲାଗେ 

ଜେଜେ ମାଆ ମୋର 

    ପୋଛି ଦେଲେ ଆଖିଲୁହ 

ଅଝଟ ମନ ମୋ 

ବୁଝିଯାଏ ସବୁ 

   ପାଇଁ ତା ଆଦର ସ୍ନେହ ।

ଭାରି ଭଲ ଲାଗେ 

ପ୍ରିୟା ଯେତେବେଳେ 

    ବୁଝେ ମନତଳ ବ୍ୟଥା 

ଇଛା ହୁଏ ଯାଇ 

ବାଣ୍ଟି ଦେବି ତାରେ 

   ମୋ ମନ ଅକୁହା କଥା ।

ଭାରି ଭଲ ଲାଗେ 

ମୋ ଭଉଣୀ ଯେବେ 

   ମିଛେ ଲୁଚେ ବାରମ୍ବାର 

ତା ମନ ର ରାଗ 

ଦୁରେଇ ଦେବାକୁ 

   ପ୍ରାଣ ହୁଅଇ ଅଧୀର ।

ଭାରି ଭଲ ଲାଗେ 

ଦେବଦାସୀ ହୋଇ 

    ଢାଳି ଦେବି ମଧୁପ୍ରୀତି 

ମନ ସିନ୍ଦୁକ ରେ 

ସାଇତି ରଖିବି 

   କେତେ ଅପାଶୋରା ସ୍ମୃତି ।