ବାପା
ବାପା
କେଉଁ ଦୁନିଆଁର ମହାର୍ଘ୍ୟ ଜିନିଷ
ତୁମକୁ ଦେବି ମୁଁ ଆଣି
ତୁମେ ତ ମୋ ପାଇଁ କୋଟି ଐଶ୍ଵର୍ଯ୍ୟ
ମୋ ପ୍ରାଣ ପରଶମଣି |
ତୁମରି ଅଙ୍ଗୁଳି ଦେଖାଇଛି ମୋତେ
ଏ ସାରା ବିଶ୍ୱର ନୀତି
ପରଶେ ଦେଇଛ ଅଦୃଶ୍ୟ ଚେତନା
ତୁମେହିଁ ମୋ ଗତି ମୁକ୍ତି |
ତୁମେ ପାଶେ ଥିଲେ କାହାକୁ ବା ଡର
କେ ନ ପାରନ୍ତି ପାଖ ମାଡି
ତୁମ ନାମେ ମୋର ପରିଚୟ ଲେଖା
ଯିବିନି ମୁଁ ପଥହୁଡ଼ି |
ତୁମେ ଦେଇଥିବା ସଂସ୍କାର ସଂସ୍କୃତି
ଏ ଜୀବନେ ମନ୍ତ୍ର ହୋଇ
ସାରା ସଂସାରରେ ଆଲୋକବର୍ତ୍ତିକା
ସାଜିବି ନିଶ୍ଚିତ ମୁହିଁ |
ତୁମ ହାତଗଢ଼ା ମାଟି ବୈକୁଣ୍ଠକୁ
ସଜାଡି ରଖିବି ମୁହିଁ
ତୁମେ ଦେଖିଥିବା ଅଧୁରା ସ୍ୱପ୍ନକୁ
ସାକାର କରିବି ମୁହିଁ |
ସ୍ୱର୍ଗ ଠାରୁ ତୁମେ ଗରୀୟାନ ବାପା
ବିଶାଳ ହୃଦୟ ତୁମ
ସେଇ ହୃଦୟରୁ କାଣିଚେ ସ୍ନେହକୁ
ମୋତେ ମିଳୁସାରା ଜନ୍ମ |
ଦୂରେଇ ରୁହନି ହେ ବାପା ମୋର
ଓହ୍ଲାଇ ଆସ ଅଚିରେ
ରୁକ୍ଷ ଏ ପୃଥିବୀ ରୁଦ୍ଧିମନ୍ତ ହେବ
ତୁମେ ଆସିବା ଖୁସିରେ |
ତୁମେ ତ ମୋହର ଦ୍ଵିତୀୟ ଈଶ୍ୱର
ଆଶୀଷରେ ଭରେ ଭାଗ୍ୟ
ତୁମ ପାଦତଳେ ମଥା ମୋର ଲୋଟୁ
ବାପା ତୁମେ ମୋର ଗର୍ବ |