ଆକାଶରୁ ମେଘ ଆସି..

 ଆକାଶରୁ ମେଘ ଆସି

 ବରଷା ହୁଏ      

 ହେମାଳ ପବନ ମିଠା

 ପରଶ ଦିଏ।

 ଶୁଖିଲା ମାଟି ଓଠରେ

 ହସ ଫୁଟଇ

 ମହକଇ ଭିଜା ମାଟି

 ଭାରି ବାସଇ । 

 

 ବିଜୁଳିର ଚମକରେ

 ଚମକେ ମାଟି

 ଘଡଘଡି ଘୋର ରଡି

 ଥରଇ ଛାତି ।

 ଶୋଇଥାଏ ମଲା ନଈ 

 ଉଠଇ ଚେଇଁ

 କୂଳ ଛୁଇଁ ଉଛୁଳଇ

 ଛାତି ଫୁଲେଇ ।

 କେଉଁଠି ତୁ ଲୁଚିଥାଉ

 ସାଧବ ବୋହୂ

 ବରଷା ସାଥିରେ ଆସି

 କୁଆଡେ ଯାଉ !

 ବେଙ୍ଗୁଲି ଗାତରେ ପାଣି

 ପାରେନି ଶୋଇ

 ରାତି ସାରା ଗୀତ ଗାଏ

 ସୁର ଲମ୍ବେଇ ।

 ଉଛୁଳନ୍ତି ମାଛ ମାନେ

 ବରଷା ସୁରେ

 ଗଛ ଚଢେ କଉ ମାଛ

 ପାଣିର ଧାରେ ।

 କଅଁଳିଆ ଦୁବ ଘାସ 

 ଛନ ଛନିଆ

 ଗୋରୁଗାଈ ମନ ଖୁସି

 ନୂଆ ଦୁନିଆ ।

 ଝରି ହେଲେ ଝର ଫିଟେ

 ବାଟ ଘାଟରେ

 ଗାଁଆ ଦାଣ୍ଡେ ପାଣି ଚାଲେ

 ସୁଅ କାଟିରେ ।

 ସବୁଆଡେ ପଚପଚ

 ପାଣି କାଦୁଅ

 ଶ୍ରାବଣରୁ ମେଘ ନେଇ

 ଭାଷେ ଭୋଦୁଅ ।

 ବରଷାକୁ ବଖାଣିଲେ

 ହୋଇବ ପୋଥି

 ବରଷା ଭରସା ଆମ

 ଜୀବନ ସାଥୀ ।