ଆଦ୍ୟ ବୈଶାଖରେ
ଆଦ୍ୟ ବୈଶାଖରେ
ଆଦ୍ୟ ବୈଶାଖରେ ଝାଞ୍ଜି ତତଲା
ପବନ ତତଲା କୁ ବାଲି ଫୁଟିଲା
ଟାଆଁସିଆ ଖରା
ଝାଳୁଆ ଶରୀରା
ଅଂଶୁଘାତର ଭୟ ଛନକା ପଶିଲା ।
ଆଦ୍ୟ ବୈଶାଖରେ ଆମ୍ବ ପାଚିଲା
ମୁଣ୍ଡି ସିନ୍ଦୁରା ଗଛ ଅଗରେ ଝୁଲିଲା
ଟେକା ପଥର
ଫାମ୍ପଡ଼ ପ୍ରହାର
ଗାଳି ମାଡ଼ ଖାତିର ନାହିଁ ମୁଁହ ଚୁଶିଲା ।
ଆଦ୍ୟ ଦୈଶାଖରେ ତାଳସଜ କଅଁଳା
ଆଖିରେ ଆଙ୍ଗୁଳି ପୁରୁ ପିତକାରି ମାରିଲା
ଚୋପା ମିଶେଇ
ପାଣି ଚୋବେଇ
ଥୁ ଥୁ ସାରି ସୁଆଦିଆ ଖଣ୍ଡ ଗିଳିଦେଲା ।
ଆଦ୍ୟ ବୈଶାଖରେ ମୁଗ ବିରି ତୋଳା
ପାଛିଆ ଧରି ସକାଳୁ ବିଲରେ ପାଲା
ମୁଣ୍ଡରେ ବାନ୍ଧି ପଗଡି
ଅଣ୍ଟାରେ ଗାମୁଛା ଭିଡ଼ି
ବିଲ କଡ଼େ ବସି ମୁଢି ତରକାରି ନାଦିଲା ।
ଆଦ୍ୟ ବୈଶାଖରେ ସଂଧ୍ୟା ଆସେ ଛାତରେ
ସୁଲୁସୁଲିଆ ପବନ ମୁଢି ମିକ୍ସଚର ବେଲାରେ
ମିଛିମିଛିକା ବୁଲାବୁଲି
ପଡ଼େ।ଶି ଘରେ ନଜର ମେଲି
ଶଶୁରି ମାରେ ମଡ଼ି ଆସିଗଲେ ଆର ଛାତରେ ।
ଆଦ୍ୟ ବୈଶାଖର ଝପେ ବରଷା
କୁଆପଥର ମାଡ କୁ ଥଣ୍ଡା ସହସା
ଝଙ୍କା ଝଙ୍କା ଖସିପଡ଼ା ଆମ୍ବ
ଆଚାର ଜାରେ ଜାରେ ମିଳିବ
ବନ୍ଧ୍ୟା ମାଟିର ଋତୁମତୀ ଗନ୍ଧ ସରସା ।
ଆଦ୍ୟ ବୈଶାଖରେ ନହୁଲି କୃଷ୍ଣଚୂଡ଼ା
ଯୌବନ ସମ୍ଭାରରେ ରଙ୍ଗୀନ ଯୋଡା
ମନଲୋଦ୍ଭା ଛବିବାସ
ରୂପସୀ ରଙ୍ଗରାସ
ମଧୁମାସର ଇଙ୍ଗିତ ମିଳେ ପ୍ରେମଯୋଡ଼ା ।
ଆଦ୍ୟ ବୈଶାଖରେ ଖରା ଛୁଟି ଦିନ
ସ୍କୁଲ ବନ୍ଦ କିନ୍ତୁ ଲାଗିରହିଛି ଟ୍ଯୂସନ
ଅଜା ଘର ମନା
ମୋବାଇଲ ମନା
ଖାଲି ପାଠ ପାଠ ମଥା ଫାଟିଯିବ ଦି ଦିନ ।
ଆଦ୍ୟ ବୈଶାଖରେ ଲସି ବେଲପଣା
ତରଭୁଜ ପଣସ ଖାଇ ଖାଇ ବଣା
ଘୋଳଦହି ସରବତ୍
ପାଣିପୁରି ଅଲବତ୍
ସଂଜ ନଇଁ ଗଲେ ଆଇପିଏଲ ସ୍କୋର ଜଣା ।
ଆଦ୍ୟ ବୈଶାଖରେ ପୋଖରି ବୁଡ଼ା
ପାଣି କମ୍ ମାଛ ଧରା ଖୋବି ମଡ଼ା
ବାଳିଆ ଶେଭଳ ମାଗୁର
ସିଙ୍ଗି ମିରିକାଳି ଭାକୁର
ମାଛଭଜା ସଙ୍ଗେ ପଖାଳ ବେଲା ଭଡ଼ା ।