सरीवर सरी आला पाऊस

 सरीवर सरी आला पाऊस ll धृ ll 

 निळे मेघ बरसती, मोत्यांच्या धारा

 सोनपिवळ्या रानी, सळसळे गंधित वारा l

 ऊन तापल्या धरतीने बदललेली कुस

 सरीवर सरी आला पाऊस ll धृ ll

     भिजले तन-मन, भिजले हिरवे क्षण

     भिजले कणकण, आनंदले पक्षीगण l

     चल कारभारणी पावसात भिजू, नको छत्री घेऊस l

     सरीवर सरी आला पाऊस ll धृ ll

 बीज अंकुरे धरतीच्या पोटात,

 फुटले हसू बळीराजाच्या ओठात l

 तुरा काढुनी डोलतो बघ कसा ऊस

 सरीवर सरी आला पाऊस ll धृ ll

     मोहरली काया, आभाळाची माया

     दीप गंगेला वाहती, सुहासिनी सया l

     लाल, पिवळ्या फुलांनी बहरला बघ कापूस

     सरीवर सरी आला पाऊस ll धृ ll

फुलवी मोर पाचूचा निळा पिसारा 

भरी मातीच्या गंधाने सृष्टीचा गाभारा l

आला नदीला पूर,

कारभारणी नको एकटी जाऊस

सरीवर सरी आला पाऊस ll धृ ll

क्षितिजावरी इंद्रधनु करी सप्तरंगाची उधळण

वर्षाराणीच्या पायी छुमछुमते बिजलीचे पैंजण l

फणा काढुनी वारूळी नागिन करते फुसफुस

सरीवर सरी आला पाऊस ll धृ ll