शब्दझुले

चल सख्या

पावसात जाऊ

श्रावण घेऊ 

अंगावर

ओवाळून टाकू

धुके

हिरव्या सोनेरी 

रंगावर

चल जरा 

बघू भिजून

निजून ढगाच्या गादीवर

बांधू चल

थोडे उंच झुले

आभाळाच्या माडीवर

हात देऊन

सरीच्या हाती

फिरून येवू रानी-वनी 

पाचूच्या त्या 

हलक्या पालख्या

वाहून नेतील सहा जणी

आला आला श्रावण

म्हणून

वाऱ्याने केला अंगार जणू

तप्त धरेने

वसुंधरेने

केला सोळा शृंगार जणु

पोरीबाळी झाल्या गोळा

झिम्मा फुगडी

मंगळागौर

पाहून सोहळे

मातीचे कोवळे

भरून आले काळे उर

नदीच्या काठा,

ओल्या वाटा

ओलीचिंब सांज खुले

मी आहे तसा बंद घरात

बांधत बसलो

शब्दझुले