ऋतूराज वसंत

सहा ऋतूंचे सहा सोहळे

निसर्गाचे ऋतुचक्र वेगळे

 प्रत्येकाचे रुप आगळे

 ऋतूराज वसंताचे खूप निराळे l

 निसर्गाने कूस बदलता

 ऋतू गेला बदलूनी

 शिशिराला मग निरोप द्याया 

आला ऋतू वसंत बहरुनी l 

स्पर्शात त्याच्या जणूं जादू भरली

 सृष्टी मनमोहक जाहली

 पानगळीच्या फांदीवरती

 कोवळी चैत्रपालवी फुटली l 

भेटीसाठी ऋतूराजाच्या होई

 आरक्त देखणा गुलमोहोर 

बहावाही आतूर होई

 लेवूनी हळदीतुरे अंगभर l 

किरमिजी शालू नेसूनी येई

 काटेसावरी अवनीवरी 

रक्तवर्णी ती पर्णे घेऊनी

 बदाम लावी हजेरी l

 मोहक गंधीत सुरंगी पिवळी

 वनी नववधू सजली 

जाई जुई मोगरा सायली

 नाजूक अबोली करवली l 

गाभुळलेली चिंच जडावूनी

 वाके उंच शेंड्यावरी 

फुले मोहोर पानोपानी

 आमराईतल्या आम्रवृक्षावरी l

 

 फणस काजूला फळेही धरती

 लटके टपोरी जांभूळ स्वारी

 जाळीमध्धी पिकती करवंदे

 लयलूट रानमेव्याची दारी l

 शितल उष्ण वारेही वाहती

 फुटे सुस्वर कोकिळकंठातूनी 

आसमंती चैतन्य पसरवीत

 येई ऋतूराजा मोहरुनी l 

निसर्गाने वसंत ऋतुला 

दिधला नववर्षाचा मान 

रांगोळ्या नी गुढी उभारुनी

 त्याचा घरोघरी सन्मान l

 सानुल्याशा चेत्रगौरीचे स्वागत माहेरी

 वसंतपंचमी उधळत येई रंग केशरी

 आल्हाददायकशा वातावरणी होई

 प्रभू श्रीरामांचे आगमन भूवरी l

 वसंताच्या सोहळ्याचे गाऊया गोडवे

 अनुभवूया रमणीय सारे क्षण 

निसर्गाच्या कॅलिडोस्कोपातील 

हे तर पवित्र मंगल हे तोरण l