पुन्हा एकदा

पुन्हा एकदा शाळेमध्ये जावे म्हणतो

आठवणींना पुन्हा उजाळा द्यावा म्हणतो

पुढे बसूनी दंगामस्ती करता आली नाही

आज शेवटच्या बाकावर दंगा घालावा म्हणतो

तास बुडवूनी माळावरती मैफील जमत होती

एकदा पुन्हा माळावरती जावे म्हणतो

ती मला पाहते कि तुला पाहते ही चढाओढ होती

पुन्हा एकदा तीला भेटण्या जावे म्हणतो

अभ्यास पूर्ण असूनही जे माझ्यासाठी छडी खात

त्या जीवलग मित्रांना मीठीत घ्यावे म्हणतो

पाठ कविता कधीच नव्हती छडी हातावर पडत होती

तीच छडी आज पुन्हा हातावर घ्यावी म्हणतो

प्रत्येक विद्यार्थी घडला पाहीजे ही तळमळ शिक्षकांची 

त्या गुरूजनांच्या चरणावरती मस्तक ठेवावे म्हणतो.