पाऊस
पाऊस
1 min
344
पाऊस म्हणजे कविता
आभाळाने लिहीलेली
पृथ्वीचा घेऊन कागद
मुक्त व्यक्त झालेली
झाडे वेली पाने
अक्षरथेंबांनी न्हाली
ही आभाळाची माया
बरसली त्यांवर ओली
भुईला आशय कळला
प्रेमातच ती पडली
आभाळाच्या कवितेने
कूस तिची मग भरली
कविता भिजवत होती
सर्वांना अंतर्बाह्य
जाणून घेत ती होती
सारे हृदयातील गुह्य
कविता आभाळाला
ऋतूचक्र बदलता सुचते...
ओढ किती लिहीण्याची ते
वाफेची शाई करते...
ही कविता आभाळाची
बेधुंद मनाला करते
आशय उलगडताना
खोल आत ती उरते...