निसर्ग

घन आच्छादले नभी

धरी ओथंबल्या धारा

घाट माथा चिंब झाला

भरून नदी किनारा ||१||

झाडे वेली पक्षी धुंद

झुळ झुळ वाहे वारा

गंध सुटता मातीला

मोर फुलवी पिसारा ||२||

पर्वत डोंगर द-या

शालू ओढून हिरवा

झाडा आडून कोकीळ

वाजवी मधुर पावा ||३||

ओढा नदी ही सागरा

गाव जाते ओलांडून

मजल दर मजल

गावोगावी आलिंगन ||४||

राणातून वाट जाते

चढून डोंगर घाट

दुर दुर मखमली

काय असे बघा थाट ||५||

पर्ण फुलांचा झुंबर

लोंबतो हा तरुवरी

निसर्गाची ती किमया

अजब ही चित्रकारी ||६||