हर्ष बळीराजाचा

मेघ दाटले आकाशात

नयनात आनंदाश्रू साठले

खूप केली प्रतिक्षा

बळीराजाचे मन सुखावले

अनुभवला मृदगंध पावसाचा

धरतीच्या पहिल्या सुगंधाचा

मयुराच्या नृत्य कलेचा

साक्षात्कार सृष्टीच्या सौंदर्याचा

राने झाली हिरवीगार

ओढे नाले तुडुंब भरले

जलधारांच्या भेटीने

धरणीमातेचे अंग शहारले

फुलांनी सर्वत्र घातले

विविध रंगांचे सडे

आकाशी इंद्रधनू उमटले

जणू नभाचे सप्तरंगी कडे

शिवार भरले मोत्याच्या दाण्याने

घास दिला धरणी मातेने

बळीराजा नतमस्तक जाहला

आशीर्वाद दिला काळ्या आईने